సయ్యద్ సోహైల్ రియాన్, రూపా కొడవాయుర్ జంటగా నటించిన లేటెస్ట్ మూవీ ‘మిస్టర్ ప్రెగ్నెంట్’. ఈ చిత్రాన్ని మైక్ మూవీస్ బ్యానర్ లో అప్పిరెడ్డి, వెంకట్ అన్నపరెడ్డి, రవీందర్ రెడ్డి సజ్జల నిర్మించారు. కొత్త దర్శకుడు శ్రీనివాస్ వింజనంపాటి రూపొందించిన ఈ సినిమా నిన్న(శుక్రవారం) థియేటర్ లలో రిలీజైంది. ఎమోషన్ ఫ్లస్ ఎంటర్టైన్మెంట్ కలిసి తెరకెక్కిన ‘మిస్టర్ ప్రెగ్నెంట్’ సినిమాకు ప్రేక్షకులతో పాటు విమర్శకుల నుంచి పాజిటివ్ టాక్ వచ్చింది. ఈ సందర్భంగా సక్సెస్ మీట్ నిర్వహించింది ‘మిస్టర్ ప్రెగ్నెంట్’ చిత్ర బృందం. ఈ కార్యక్రమంలో..
హీరో సోహైల్ మాట్లాడుతూ – నేను పదహారేళ్లుగా ఇండస్ట్రీలో పడుతున్న కష్టానికి ఇవాళ ఫలితం దక్కిందని అనుకుంటున్నాను. ‘మిస్టర్ ప్రెగ్నెంట్’ కు వచ్చిన ప్రతి రివ్యూలో సోహైల్ బాగా నటించాడని రాశారు. నేనొక నటుడిని అని గుర్తింపు దక్కినందుకు సంతోషంగా ఉంది. సిటీలో మల్టీఫ్లెక్స్ వెళ్లి చూశా. సినిమా చూసి బయటకు వస్తున్న ప్రేక్షకులు బాగా నటించావు అంటూ హగ్ చేసుకుంటున్నారు. ఒక మంచి సినిమా చేశామని చెబుతున్నారు. పబ్లిక్ టాక్ వినండి.. ఏ ఒక్కరూ నెగిటివ్ గా చెప్పలేదు. అక్కడే మేము సక్సెస్ అయ్యాం. యూట్యూబ్ లో కొందరు స్పాయిలర్స్ సినిమాల మీద నెగిటివ్ కామెంట్స్ చేస్తున్నారు. దయచేసి సినిమా రిలీజైన వెంటనే ఆ సినిమాను దెబ్బతీసే వీడియోలు చేయకండి. మీ వల్ల సినిమా కోసం పనిచేసే ఎంతోమంది నష్టపోతారని గుర్తుపెట్టుకోండి.
అంతేకాదు రీ రిలీజ్‌లు అనేవి శుక్రవారం రోజు వద్దు. సోమ, మంగళ, బుధ ఇలా మిగిలిన ఏ రోజైనా పెట్టుకోవచ్చు. పెద్ద సినిమాలు లేనప్పుడే చిన్న సినిమాలకు అవకాశాలు ఉంటాయి. మాకొక స్పేస్ దొరికిందని చిన్న సినిమాలను ఆడించుకుంటారు. దీనిపై నిర్మాతలు ఎందుకు మాట్లాడటం లేదు. మా సినిమా నిర్మాతని కూడా నేను ఇదే అడుగుతున్నా. దీనిపై ఎందుకు మాట్లాడటం లేదు. దీని గురించి చాలామందికి అడగాలని ఉంటుంది కానీ.. అడగట్లేదు. ఓటీటీలో కూడా శుక్రవారం రోజునే రిలీజ్ కాకుండా మిగతా రోజుల్లో రిలీజ్ చేయొచ్చు కదా అన్నారు.
నిర్మాత అప్పిరెడ్డి మాట్లాడుతూ – ‘మిస్టర్ ప్రెగ్నెంట్’ కు వస్తున్నరెస్పాన్స్ చాలా సంతోషంగా ఉంది. ప్రేక్షకులకు థాంక్స్. కొత్త కాన్సెప్ట్ అయినా ప్రేక్షకులు ఆదరిస్తున్నారు. తెలుగు తెరపై ఇలాంటి సినిమా రాలేదు. మేము ఆ ప్రయత్నం చేశాం. మేము ఈ కథ అనుకున్నప్పుడు కొంతమంది బాలీవుడ్ లో ఆయుశ్మాన్ ఖురానాతో చేస్తే నేషనల్ వైడ్ మంచి హిట్ అవుతుందని సజెస్ట్ చేశారు. అయితే ఆలోగా కోవిడ్ రావడంతో ఆ ప్రయత్నం ఆపేశాం. సోహైల్ మన టాలీవుడ్ ఆయుశ్మాన్ ఖురానా అనుకుంటాను నేను. అంత బాగా పర్ ఫార్మ్ చేశాడు. ఇది కొత్త కథ. సెన్సిటివ్ సబ్జెక్ట్. కొద్దిగా బ్యాలెన్స్ తప్పినా మొత్తం సినిమా రిజల్ట్ వేరేగా ఉంటుంది. తెలుగు ఆడియెన్స్ కు కొత్త అనుభూతిని ఇస్తుంది. మేము ఈ కథను నమ్మి బడ్జెట్ ఎక్కువైనా చేశాం. అమ్మ కోసం చేస్తున్న సినిమా కాబట్టి బడ్జెట్ గురించి ఆలోచించలేదు. మా సినిమా చూసిన లేడీ ఆడియెన్స్ ఎమోషనల్ గా మాట్లాడుతున్నారు.
ఇకపోతే ఇండస్ట్రీలో హీరోలకు, ప్రొడ్యూసర్స్ కు నేను ఒక రిక్వెస్ట్ చేస్తున్నా. రీ రిలీజ్‌లకు గానీ.. పెద్ద హీరోలకు గానీ మేం వ్యతిరేకం కాదు. అయితే చిన్న సినిమాలకు ఎప్పుడో ఒకసారి ఒక మంచి రిలీజ్ డేట్ దొరుకుతుంది. ఆ ఫ్రైడేనే పెద్ద హీరోల సినిమాలు, తమిళ హిట్ సినిమాల రీ రిలీజ్ లు చేస్తున్నారు. చిన్న సినిమా నిర్మాతగా నేను రిక్వెస్ట్ చేసేది ఏంటంటే.. చిన్న సినిమాలు వచ్చినప్పుడు.. పెద్ద సినిమాలు రీ రిలీజ్ చేస్తుంటే.. చిన్న సినిమాలకు చాలా నష్టం జరుగుతుంది. ఈ విషయాన్ని నేను ప్రొడ్యుసర్ కౌన్సిల్‌లో కూడా లేవనెత్తాను. దయచేసి మీ రీ రిలీజ్ లు ఫ్రైడే కాకుండా మరో రోజు చూసి చేసుకోవాలని కోరుతున్నా అన్నారు.
