రాజ్యసభ సభ్యులు సంతోష్ కుమార్ చేప‌ట్టిన గ్రీన్ ఇండియా ఛాలెంజ్‌కి మంచి ఆద‌ర‌ణ ల‌భిస్తుంది. ప్రముఖ రాజకీయ నాయ‌కులు, సెల‌బ్రిటీలు, క్రీడా ప్రముఖులు ఇందులో భాగం అవుతున్నారు. ఇప్పటికే పలువురు సినీ , రాజకీయ , క్రీడా , బిజినెస్ ప్రముఖులు ఈ ఛాలెంజ్ లో పాల్గొనగా..తాజాగా అందాల రాక్షసి లావణ్య త్రిపాఠి ఈ ఛాలెంజ్ లో పాల్గొంది.
ప్రముఖ దర్శకురాలు నందిని రెడ్డి ఇచ్చిన గ్రీన్ ఇండియా ఛాలెంజ్‌ను స్వీకరించి సోమవారం సహస్త్రధర ఉత్తరాఖండ్‌లో తన స్నేహితులు, కుటుంబ సభ్యులతో కలిసి 50 మొక్కలను నాటారు హీరోయిన్ లావణ్య త్రిపాఠి. ఈ విషయాన్ని ఆమె తన ఇన్‌స్టాగ్రమ్ ఖాతాలో తెలియజేసింది.
ఈ సందర్భంగా లావణ్య త్రిపాఠి మాట్లాడుతూ.. ‘‘గ్రీన్ ఇండియా ఛాలెంజ్ అనే కార్యక్రమాన్ని మొదలుపెట్టి మా అందరి చేత మొక్కలు నాటిస్తున్న రాజ్యసభ సభ్యులు సంతోష్‌గారికి అభినందనలు. గ్రీన్ ఇండియా ఛాలెంజ్ కార్యక్రమం ఇదేవిధంగా కొనసాగాలని కోరుకుంటున్నాను. నా వంతుగా మరో ఐదుగురిని ఈ ఛాలెంజ్‌కు నామినేట్ చేస్తున్నాను. నటి రీతు వర్మ, హీరో కార్తికేయ, వెన్నెల కిషోర్, సైనా నెహ్వాల్, అనితా రెడ్డిలను ఈ గ్రీన్ ఇండియా ఛాలెంజ్ స్వీకరించి మొక్కలు నాటాల్సిందిగా కోరుతున్నాను..’’ అని చెప్పుకొచ్చింది.