అధికార వైసీపీ ఫోన్ ట్యాపింగ్ కు పాల్పడుతోందంటూ టీడీపీ అధ్యక్షుడు చంద్రబాబునాయుడు ప్రధాని నరేంద్ర మోదీకి లేఖ రాయడం పట్ల వైసీపీ ఎమ్మెల్యే అంబటి రాంబాబు స్పందించారు. ఆ లేఖలో చంద్రబాబు మోదీ డైనమిక్ నాయకుడు అంటూ పేర్కొనడాన్ని అంబటి ప్రత్యేకంగా ప్రస్తావించారు. నాడు ఎన్నికలకు ముందు ప్రధాని మోదీని నానా మాటలు అన్న చంద్రబాబు ఇవాళ ఆయనను పొగడ్తల్లో ముంచెత్తుతున్నారని అన్నారు. అందితే జుట్టు, అందకపోతే కాళ్లు.. ఇదీ చంద్రబాబు నైజం అంటూ విమర్శించారు.
“ఎన్నికలకు ముందు ఇదే చంద్రబాబు ప్రధాని మోదీని ఏమన్నారో ఓసారి గుర్తుచేసుకోవాలి. మోదీ వ్యతిరేక శక్తులతో కలిసి మోదీని దింపేస్తానని ప్రగల్భాలు పలికిన చంద్రబాబుకు ఇవాళ ఆయన నాయకత్వంపై ఇంత నమ్మకం ఎలా కలిగింది? అందితే జుట్టు, అందకపోతే కాళ్లు… చంద్రబాబు నైజం ఇదేనని మేం ఎప్పటినుంచో చెబుతున్నాం. ప్రజలందరికీ ఈ సంగతి తెలుసు. ఇలాంటి దౌర్భాగ్యమైన, చవకబారు రాజకీయాలు చేసేది చంద్రబాబే” అంటూ విమర్శించారు.