పెళ్లిచూపులు చిత్రంతో తన సత్తా చాటిన తరుణ్ భాస్కర్..తాజాగా బంపర్ ఆఫర్ కొట్టేసాడనే వార్తలు చక్కర్లు కొడుతున్నాయి. పెళ్లి చూపులు చిత్రం తర్వాత ఈ న‌గ‌రానికి ఏమైంది, న‌టుడిగా నీకు మాత్ర‌మే చెప్తా వంటి చిత్రాల త‌రువాత తరుణ్ భాస్కర్ నుంచి మ‌రో సినిమా రాలేదు.
విక్ట‌రీ వెంక‌టేష్‌తో తన త‌దుప‌రి చిత్రాన్ని చేయాల‌ని తరుణ్ భాస్కర్ ఎదురుచూస్తున్నారు. క‌రోనా వ‌ల్ల అది ఇప్ప‌ట్లో సాధ్యం అయ్యేలా క‌నిపించ‌డం లేదు. దీంతో గ‌త కొన్ని నెల‌లుగా ఖాలీగానే వుంటున్న తరుణ్ భాస్క‌ర్‌కు పీవీపీ సంస్థ బంపర్ ఆఫర్ ఇచ్చిన‌ట్టు తెలిసింది. త‌మిళంలో సూప‌ర్ హిట్‌గా నిలిచిన ఓ మై క‌డ‌వులే చిత్రాన్ని పీవీపీ సంస్థ తెలుగులో రీమేక్ చేయ‌బోతోంది. ఇందు కోసం పీవీపీ సంస్థ తరుణ్ భాస్క‌ర్‌కు భారీ మొత్తం ఆఫర్ చేసింద‌ని, ఆఫర్ న‌చ్చ‌డంతో తరుణ్ ఇప్ప‌టికే ప‌ని మొద‌లుపెట్టిన‌ట్టు చెబుతున్నారు. మరి ఇందులో ఎంత నిజం ఉందనేది తెలియాల్సి ఉంది.
