కాంగ్రెస్ సీనియర్ నాయకురాలు విజయశాంతి..తెలంగాణ ముఖ్యమంత్రి కేసీఆర్ కు ఘాటైన లేఖ రాసారు. లాక్‌డౌన్ కారణంగా స్కూళ్లు మూతపడ్డాయి. దీంతో ప్రయివేట్ స్కూళ్లలో పని చేసే చాలా మంది టీచర్లు ఉద్యోగాలను కోల్పోయారు. నెలల తరబడి జీతాలు లేకపోవడంతో గత్యంతరం లేని పరిస్థితుల్లో కుటుంబ పోషణ కోసం తోచిన పనులు చేస్తున్నారు. వీరి కష్టాలను చూసిన విజయశాంతి..త్వరగా వీరిని ఆదుకోవాలని కేసీఆర్ కు లేఖ రాసారు.
‘తెలంగాణలో ప్రయివేట్ టీచర్లు వీధినపడుతున్న పరిస్థితి రాష్ట్ర ప్రతిష్టకు మచ్చగా మారింది. ప్రయివేట్ స్కూల్ టీచర్ల వ్యథ గురించి ప్రధాన మీడియాలో, సోషల్ మీడియాలో కుప్పలుతెప్పలుగా వార్తలు వస్తున్నప్పటికీ తెలంగాణ సర్కారు మాత్రం ఏమీ చలించడం లేదు. రాష్ట్రంలో చాలా ప్రయివేట్ విద్యాసంస్థలు టీచర్లను ఇష్టమొచ్చినట్టు తొలగించి వారి జీవితాలతో ఆటలాడుకుంటున్నాయి. కొందరికి మాత్రం చాలీచాలని జీతాలిచ్చి.. ఇంకొందరికి అడ్మిషన్లు తెస్తేనే మీ ఉద్యోగం ఉంటుందని వార్నింగ్ ఇచ్చాయి.
ఈ మధ్యే వచ్చిన వార్తలను గమనిస్తే ఉద్యోగం కోల్పోయి ఒక ప్రయివేట్ స్కూలు టీచర్ ఖమ్మంలో టిఫిన్ బండి పెట్టుకున్నారు. యాదాద్రిలో మరొక ప్రయివేట్ స్కూల్ టీచర్ కుటుంబాన్ని పోషించుకోవడానికి దినసరి కూలీగా మారారు. మహిళా టీచర్లు కొందరు బీడీలు చుట్టే పనుల్లోకి, మాస్కుల తయారీ, టైలరింగ్ ఇంకా ఉపాధి హామీ పనుల్లోకి వెళ్ళాల్సి వచ్చింది. మన గ్రంథాలు, సమాజ వ్యవస్థలు గురువులకు ఎంతో గౌరవాన్నిచ్చాయి. అయితే, తెలంగాణలో మాత్రం టీచర్లు తిప్పలు పడాల్సిన పరిస్థితి వచ్చింది.
ఇదిలా ఉంటే కరోనా సమస్యలు, లాక్‌డౌన్ వల్ల ట్యూషన్ ఫీజులు మాత్రమే తీసుకోవాల్సిన ప్రయివేట్ స్కూళ్ళు మొత్తం ఫీజు కోసం తల్లిదండ్రులకు ఫోన్లు చేసి ఒత్తిడి చేస్తున్నాయి. మొత్తం ఫీజు చెల్లించకపోతే వారి పిల్లలకు డిజిటల్ క్లాసులు నిలిపివేస్తున్నాయి. ఈ పరిస్థితిని మీడియాలో కళ్ళకు కట్టినట్టు చెబుతూనే ఉంది. తెలంగాణలో విద్యావ్యవస్థ తీరు రోజురోజుకూ దిగజారుతోందనడానికి ఇంతకంటే ఉదాహరణలు అవసరం లేదు. కేసీఆర్ దొర గారి సర్కారు ఇప్పటికైనా ఈ విషయం మీద దృష్టి సారించకుంటే పరిస్థితి మరింత దారుణంగా మారిపోతుంది’’ అని విజయశాంతి ఆవేదన వ్యక్తం చేశారు.
