తెలంగాణలో గ్రూప్-2 పరీక్షల తేదీలు ఖరారయ్యాయి. ఆగస్టు 29, 30 తేదీల్లో గ్రూప్-2 పరీక్షలు నిర్వహించనున్నట్లు తెలంగాణ రాష్ట్ర పబ్లిక్‌ సర్వీస్‌ కమిషన్‌ (TSPSC) ప్రకటించింది. పరీక్షకు వారం రోజులు ముందు నుంచే హాల్‌టికెట్లను డౌన్‌లోడ్ చేసుకోవచ్చని టీఎస్‌పీఎస్‌సీ వెల్లడించింది. గ్రూప్-2 ఉద్యోగాలకు సంభందించి 783 పోస్టుల భర్తీకి గతేడాది డిసెంబర్ 29న టిఎస్‌పిఎస్‌సి నోటిఫికేషన్ విడుదల చేయగా.. జనవరి 18 నుంచి ఫిబ్రవరి 16 వరకు దరఖాస్తులు స్వీకరించింది. మొత్తం 5,51,943 మంది అభ్యర్థులు దరఖాస్తు చేసుకోగా చివరి మూడు రోజుల్లోనే 1.10 లక్షల దరఖాస్తులు రావడం గమనార్హం. గ్రూప్ -2 పరీక్షకు ఒక్కో పోస్టుకు సగటున 705 మందికి చొప్పున పోటీ పడనున్నారు. ఇక ఇతర పోటీ పరీక్షల తేదీలను దృష్టిలో ఉంచుకొని అభ్యర్థులకు ఎలాంటి ఇబ్బందులు తలెత్తకుండా అన్ని విషయాలను పరిగణనలోకి తీసుకున్న తర్వాతనే పరీక్ష తేదీలను నిర్ణయించామని అధికారులు తెలిపారు.
