ఏపీలో వైసీపీ పాలనపై టీడీపీ నేతలు.. కార్యకర్తలు తీవ్ర వ్యాఖ్యలు చేస్తున్నారు. అదేమంటే.. విశాఖపట్నం సౌత్ లో ఉన్న సెంట్రల్ పార్కు పేరును వైఎస్సార్ పార్కుగా మారుస్తూ ఏపీ ప్రభుత్వం తాజాగా కీలక నిర్ణయం తీసుకుంది. దీంతో ఈ నిర్ణయాన్ని వ్యతిరేకిస్తూ టీడీపీ నేతలు, కార్యకర్తలు ఆందోళనకు దిగారు. కాగడాలు తీసుకుని నిరసన ప్రదర్శన చేపట్టారు. టీడీపీ అధినేత చంద్రబాబు సీఎంగా ఉన్న సమయంలో.. కోట్ల రూపాయలు వెచ్చించి.. కష్టపడి ఈ పార్కును నిర్మించారని టీడీపీ నేతలు ఈ సందర్భంగా వెల్లడిస్తూ ఆందోళనకు దిగారు.
అదేవిధంగా నేతలు.. కార్యకర్తలు మాట్లాడుతూ.. చంద్రబాబు కట్టిన పార్కుకు వైఎస్ రాజశేఖరరెడ్డి పేరును ఎలా పెడతారని నిలదీశారు? సెంట్రల్ పార్కుకు వైఎస్ పేరు కొనసాగిస్తామంటే ఊరుకొనేది లేదని హెచ్చరించారు. ఈ విషయంలో ప్రభుత్వం నిర్ణయం మార్చుకొనేంతవరకు తాము ఉద్యమిస్తామని కూడా స్పష్టం చేశారు. విశాఖలో సెంట్రల్ పార్కు పేరును వైఎస్ఆర్ సెంట్రల్ పార్కుగా మార్చారు. మంత్రులు బొత్స సత్యనారాయణ, అవంతి శ్రీనివాస్ కొత్తపేరుతో ఉన్న శిలాఫలకాన్ని రూపొందించి ప్రారంభించారు. సెప్టెంబర్ 2 వైఎస్ఆర్ వర్ధంతి నాటికి పార్కులో ఆయన విగ్రహాన్ని కూడా ఏర్పాటు చేస్తామని ఈ సందర్భంగా మంత్రులు వివరించారు.