ఓ మీడియా సంస్థ నిర్వహించిన ‘ మీట్ ద ప్రెస్’ కార్యక్రమంలో కేటీఆర్ పాల్గొన్నారు. ఈ సందర్భంగా ఆయన టీఆర్ఎస్ పరిపాలనకు సంబంధించిన అనేక విషయాలపై స్పందిచారు. దేశంలోనే సీఎం కేసీఆర్ అద్భుత పాలన అందిస్తున్నారని పేర్కొన్నారు. పక్క రాష్ట్రానికి చెందిన సీఎం.. తమ పరిపాలన విషయంలో తలదుర్చడం సరికాదన్నారు.
ఏపీ పాలనకు, తెలంగాణ పాలనకు పోలికే లేదన్నారు. ఇక్కడ అమలు చేస్తున్న రైతు బంధు, మిషన్ బగీరథ లాంటి ప్రతిష్ఠాత్మక పథకాలు అక్కడ అమలు చేస్తున్నారా ? అని ప్రశ్నించారు. అలాగే తెలంగాణ ప్రభుత్వం అమలు చేస్తున్న సంక్షేమ పథకాలు ఏపీలో అమలు చేయగలరా ? అంటూ ఏపీ సీఎం చంద్రబాబుపై మాజీ మంత్రి కేటీఆర్ తీవ్ర స్థాయిలో విమర్శలు చేశారు.
చంద్రబాబు ఏనాడు ఒంటరిగా పోటీ చేయలేదని, ఓడిపోతామన్న భయంతోనే ఆయన ఏదో ఒక పార్టీతో పొత్తుపెట్టుకుంటారని విమర్శించారు. మొన్న బీజేపీ, ఈ రోజు కాంగ్రెస్, ఒకప్పుడు టీఆర్ఎస్, వామపక్షాలు ఇలా అన్ని పార్టీలతో ఆయన పొత్తు పెట్టుకున్న విషయాన్ని ఆయన గుర్తు చేశారు. అవసరమైతే చంద్రబాబు వైసీపీతో పొత్తుపెట్టుకుంటారని మాజీ మంత్రి కేటీఆర్ ఎద్దేవ చేశారు.