ఇప్పటికే గ్రీన్ ఇండియా ఛాలెంజ్ చేపట్టి దేశ వ్యాప్తంగా ఎంతో పేరు తెచ్చుకున్న ఎంపీ జోగిన‌ప‌ల్లి సంతోష్ కుమార్..ఇప్పుడు మరో బృహ‌త్త‌ర కార్యక్రమం చేపట్టబోతున్నారు. ఫిబ్ర‌వ‌రి 17వ తేదీన తెలంగాణ రాష్ట్ర ముఖ్యమంత్రి కేసీఆర్ తన 67వ పుట్టినరోజు జరుపుకోనున్నారు. ఈ సందర్భంగా ఎంపీ జోగిన‌ప‌ల్లి సంతోష్ కుమార్ కోటి మొక్కలను నాటే కార్య‌క్ర‌మాన్ని చేపట్టబోతున్నారు. ఈ విషయాన్ని యాంకర్ అనసూయ తెలియజేస్తూ ఇందులో అంతా భాగం కావాలని పిలుపునిస్తూ ఓ వీడియో షేర్ చేశారు.
”ఈ రాష్ట్రం నాకు ఏమి ఇచ్చింద‌ని కాదు. ఈ రాష్ట్రానికి నేను ఏం ఇచ్చాను అని ఆలోచిస్తున్నారా.. అయితే రండి. మన భావిత‌రాల కోసం గ్లోబల్ వార్మింగ్, కాలుష్యాన్ని త‌గ్గించేందుకు మనవంతు ప్రయత్నంగా ఫిబ్ర‌వ‌రి 17న కేసీఆర్ పుట్టినరోజు సందర్భంగా నిర్వహిస్తున్న కోటి వృక్షార్చనలో పాల్గొందాం. ఒక్కొక్కరం మూడు మొక్కలను నాటుదాం. ఈ సంకల్పంలో పాల్గొనాలనుకునేవారు వెంటనే మీ డీటైల్స్ వాట్సాప్ చేయండి” అని పేర్కొంటూ వాట్సాప్ నంబర్ ఇచ్చారు అనసూయ. అలాగే సూపర్ స్టార్ మహేష్ బాబు సైతం ఈ కార్య క్రమానికి మద్దతు తెలిపారు. కూతురు సితార, కొడుకు గౌతమ్, మహేష్ బాబు మొక్కలు నాటుతున్న దృశ్యాలతో కూడిన వీడియో షేర్ చేస్తూ ”గ్లోబల్ వార్మింగ్‌ను తగ్గించడానికి మన దగ్గర ఉన్న ఏకైక మార్గం మొక్కలు నాటడమే” అని ట్వీట్ చేశారు.
