ఆంధ్రప్రదేశ్ ముఖ్యమంత్రి గా ప్రమాణ స్వీకారం చేసిన జగన్ మోహన్ రెడ్డి పాలనకు ఏడాది గడుస్తున్నా సందర్బంగా వైసీపీ నేతలు , కార్య కర్తలు సంబరాలు చేసుకుంటుండగా..ప్రతిపక్షాలు మాత్రం వైసీపీ పార్టీ ఫై సెటైర్లు వేస్తున్నారు. టీడీపీ నేత నారా లోకేష్… 65 కోర్టు మొట్టికాయలు, రాజ్యాంగ అతిక్రమణలతో జగన్ ఏడాది పాలన సాగిందంటూ ట్విట్టర్‌లో ఘాటు విమర్శలు చేశారు.
కోర్టు ధిక్కారాలు, జాతీయస్థాయిలో తుగ్లక్ ప్రభుత్వం, తీవ్రవాద ప్రభుత్వం అంటూ బిరుదులు వచ్చాయని ఎద్దేవా చేశారు. గిట్టుబాటు ధర లేక రైతులు విలవిల్లాడుతున్నారని, బీసీలు, ఎస్సీ, ఎస్టీలు అందరూ దగా పడ్డారని మండిపడ్డారు. అన్నదాతలు, నిర్మాణ రంగ కార్మికులు ఆత్మహత్యలు చేసుకున్నారని, 160 రోజులుగా అమరావతి కోసం మహిళల ఆధ్వర్యంలో ఉద్యమం కొనసాగుతోందని అన్నారు. ఇకనైనా పాలకులు… పాలన అంటే ఏమిటో తెలుసుకోవాలని సూచించారు.