శ్రీశైలం జల విద్యుత్ కేంద్రంలో గురువారం అర్ధరాత్రి భారీ అగ్ని ప్రమాదం చోటు చేసుకుంది. నాగర్‌కర్నూల్‌ జిల్లా అమ్రాబాద్ మండలం దోమల పెంట శ్రీశైలంప్రాజెక్టు లెఫ్ట్ పవర్ హౌస్‌లో ఈ ప్రమాదం జరిగింది. విద్యుత్ తయారీ కేంద్రంలోని మొదటి యూనిట్‌లో భారీ పేలుడు సంభవించి, అకస్మాత్తుగా మంటలు చెలరేగాయి. ఈ మంటలు ఎగిసిపడడంతో దట్టంగా పొగలు అలుముకున్నాయి. వెంటనే అప్రమత్తమైన ఉద్యోగులు బయటకు పరుగులు తీశారు. విధుల్లో ఉన్న వారిలో పది మంది బయటకు రాగా.. 9 మంది గల్లంతు అయ్యారు.
సంఘటనా స్థలానికి చేరుకున్న అగ్నిమాపక సిబ్బంది మంటలను ఆర్పే ప్రయత్నం చేస్తున్నారు. గల్లంతైన వారిలో డీఈ శ్రీనివాస్‌, ఏఈలు సుందర్, మోహన్ కుమార్, సుష్మా, ఫాతిమా, వెంకట్రావు, రాంబాబు, ఇద్దరు అమ్రాన్ కంపెనీ సిబ్బంది ఉన్నారు. వారి కోసం రెస్క్యూ టీమ్‌ గాలింపు చర్యలను ముమ్మరం చేసింది.