ఆంధ్రప్రదేశ్ లో కరోనా వైరస్ తీవ్రత ఎక్కువగా ఉన్న సంగతి తెలిసిందే. సామాన్య ప్రజలే కాక వైద్యం అందిస్తున్న డాక్టర్లు సైతం దీని బారిన పడుతున్నారు. తాజాగా కరోనా వైరస్ కారణంగా డాక్టర్ మరణించడం ఫై బాబు ఫైర్ అయ్యాడు. ఈ మేరకు శుక్రవారం చంద్రబాబు వరుస ట్వీట్లు చేశారు.
‘‘తెనాలి ఆసుపత్రిలో రోగులకు వైద్యసేవలందిస్తూ కరోనా బారినపడి “నా బిడ్డల కోసం బతకాలి. మెరుగైన చికిత్స అందించి బతికించండి” అని వేడుకున్న వైద్యుడి ప్రాణాలు కూడా నిలపలేని స్థితిలో రాష్ట్రం ఉండటం శోచనీయం. “మర్యాద లేనిచోట పనిచేయలేమంటూ” వైద్యుల సంఘం సీఎస్ కు లేఖరాయడం రాష్ట్రంలో దుస్థితికి నిదర్శనం. సమీక్షా సమావేశానికి కాస్త ఆలస్యంగా వచ్చినందుకు ప్రకాశం డీఎంహెచ్‌వోను నిల్చోబెట్టారు. అనంతపురం డీఎంహెచ్ వోను వ్యక్తిగతంగా దూషించారు.
శ్రీకాకుళం, నెల్లూరు డీఎంహెచ్‌వోలను సెలవుపై వెళ్లాలని ఒత్తిడి చేస్తుండటంతో పని చేయలేక పోతున్నట్లుగా వైద్యుల సంఘం లేఖలో డాక్టర్లు ఆవేదన వెలిబుచ్చారు. విజయవాడ, తెనాలి, నెల్లూరులలో డాక్టర్లు మరణించినా ఇంతవరకు నష్ట పరిహారం ప్రకటించలేదని వాపోయారు. మాస్క్‌ల కోసం విశాఖలో డాక్టర్ల ధర్నా, రక్షణ పరికరాల కోసం ఒంగోలులో ల్యాబ్ టెక్నీషియన్ల ధర్నా.. ఏమిటివన్నీ? మాస్క్ అడిగాడని దళిత డాక్టర్ సుధాకర్‌పై కక్షగట్టి, నడిరోడ్డుపై లాఠీలతో కొట్టించారు.
చిత్తూరు జిల్లాలో డా. అనితారాణిపై అసభ్య వీడియోలు తీశారు. కరోనా విపత్తులో తమ ప్రాణాలు అడ్డుపెట్టి, ప్రజల ప్రాణాలు కాపాడే వైద్యుల పట్ల ఏమిటీ అమానుషాలు? ఏ రాష్ట్రంలోనైనా వైద్యుల పట్ల ఈ నిర్లక్ష్యం ఉందా?
కరోనా నుంచి రికవరీలో ఏపీ అట్టడుగున ఉండటం చూస్తే బాధేస్తోంది. మరోవైపు ఫ్రంట్ లైన్ వారియర్లపై ప్రభుత్వ నిర్లక్ష్యం ఆవేదన కలిగిస్తోంది. ఇవి చాలవన్నట్లు కరోనా కిట్ల స్కామ్, బ్లీచింగ్ పౌడర్ కుంభకోణాలతో వైసీపీ నేతల అవినీతి వ్యాప్తి కరోనాతో పోటీపడుతోంది. కరోనా విధుల నిర్వహణలో ప్రాణాలు కోల్పోయిన వైద్యులు, సిబ్బందికి ప్రభుత్వం వెంటనే పరిహారం అందించాలి. వైద్యులకు, సిబ్బందికి ప్రత్యేక భద్రతా పరికరాలు అందించాలి.’’ అని చంద్రబాబు పేర్కొన్నారు.