బీజేపీ రాష్ట్ర కార్యాలయంలో సోమవారం రాష్ట్ర కోర్ కమిటీ సమావేశం జరిగింది. కోర్ కమిటీ సాక్షిగా కమలం పార్టీలో కల్లోలం రేగింది. పార్టీ ప్రవర్తనను సీమాంధ్ర నేతలు సీరియస్ ప్రశ్నించారు. సీమాంధ్రలో పార్టీ కార్యాలయాలపై దాడులు జరుగుతున్నా, పార్టీ సమావేశాలను అడ్డుకుంటున్నా.. భౌతిక దాడులకు పాల్పడుతున్నా.. పార్టీ నిర్ణయాన్ని ఎదిరించలేదు. ఆడ్వాణీ, రాజ్‌ నాథ్ సింగ్, మోదీ తెలంగాణలోనే పర్యటించినా.. సర్దుకుపోయామని సీమాంధ్ర నేతలు ఆవేదన వ్యక్తం చేశారు. కానీ కేసీఆర్ సీమాంధ్రులపై తీవ్ర వ్యాఖ్యలు చేసిన వేదికపైనే బీజేపీ నేతలు వుండటం.. పైగా ఎటువంటి అభ్యంతరం తెలపకపోవడంపై సీమాంధ్ర భాజపా నేతలు ఆగ్రహం వ్యక్తం చేసినట్లు తెలుస్తోంది.
“మీరే పార్టీని నడిపించుకోండి.. నేను వైదోలుగుతానని” భాజపా రాష్ట్ర పార్టీ అధ్యక్షుడు కిషన్ రెడ్ది అన్నాండంటే పరిస్థితి ఏ మేరకు వచ్చిందో అర్థంచేసుకోవచ్చు. విభజన లొల్లితో రెండు ప్రాంతాల భాజపా నేతలు హస్తినా బాట పట్టనున్నారు. ఆది నుంచి తెలంగాణకు అనుకూలమని ప్రకటికించిన కమలనాథులకు కూడా విభజన కష్టాలు తప్పడంలేదన్న మాట.