ప్రస్తుతం రాష్ట్రంలో చోటుచేసుకున్న సంక్షోభ పరిస్థితులపై వివిధ వర్గాల అభిప్రాయాలను తెలుసుకోవడానికి తెదేపా అధినేత చంద్రబాబు నాయుడు ప్రయత్నాలు మొదలుపెట్టారు. దీంట్లో భాగంగానే ఈరోజు (శనివారం) వివిధ పత్రికల సంపాదకులతో బాబు తన నివాసంలో సమావేశమయ్యారు. ఈ సమావేశానికి సుమారు 20మంది పత్రిక సంపాదకులు హాజరైనట్లు తెలుస్తోంది. రాష్ట్రానికి సంబంధించిన పలు కీలక అంశాలపై బాబు సంపాదకులతో చర్చించారని, వాటికి సంబంధించి వారి అభిప్రాయలను సైతం తీసుకున్నారు. రాష్ట్ర విభజనపై తాను తీసుకున్న నిర్ణయానికి కట్టుబడి వుంటానని బాబు ఈ సందర్భంగా స్పష్టం చేసినట్లు సమాచారం. ముఖ్యంగా విభజన విషయంలో సీమాంధ్రలో చెలరేగిన ఆందోళనలను చల్లార్చేందుకు తీసుకోవాల్సిన అంశాలపై సంపాదకుల సలహాలు, సూచనలను బాబు అడిగితెలుసుకున్నట్లు తెలుస్తోంది.
కాంగ్రెస్ అధిష్టానం చేసిన ప్రకటనకు ఆ పార్టీ నేతలే కట్టుబడి వుండలేకపోతున్న నేపథ్యంలో.. రాష్ట్రంలో నెలకొన్న సంక్షోభ పరిస్థితులపై బాబు అన్ని వర్గాల అభిప్రాయాలను తీసుకోవడాన్ని పలువురు హర్షం వ్యక్తం చేస్తున్నారు. ఇలాంటి చర్చలు తెదేపాకు రాజకీయంగా కూడా చాలా మేలు చేస్తాయని రాజకీయ విశ్లేషకులు అభిప్రాయపడుతున్నారు.
