హస్తిన లో ఉండలేక, తమ స్వంత నియోజక వర్గాలకు రాలేక సీమాంధ్ర మంత్రులు, ఎం పి లు నాయకులు ముందు నుయ్యి, వెనుక గొయ్యి లా నానా అవస్థలు పడుతున్నారు. ఒకపక్క అధిష్టానాన్ని ఒప్పించలేక, మరోపక్క సమైక్యాంధ్ర ఉద్యమ తీవ్రతను తట్టుకోలేక వారు తల్లడిల్లిపోతున్నారు. తమ వాదన వినిపించేందుకు ఎంతగా ప్రయత్నించినా అధిష్టానం వాటిని ఖాతరు చేయకపోవటం వాళ్ళను తీవ్ర మనస్తాపానికి గురి చేస్తోంది. దారుణమైన విషయమేవిటంటే ఇప్పటివరకూ సీమాంధ్ర కాంగ్రెస్ నాయకులకు తమ గోడు చెప్పుకునేందుకు కాంగ్రెస్ అధినేత్రి సోనియాగాంధి అప్పాయింట్ మెంట్ కూడా దొరకని సిగ్గుమాలిన పరిస్థితి నెలకొంది. ఆ కారణంగానే ఈ రోజు దాకా వారు తమ అరణ్యరోదనను రెండవశ్రేణి నాయకులైన దిగ్విజయ్ సింగ్, ఆంటోని, ఆజాద్, వీరప్ప మొయిలీ లాంటి వారికి మాత్రమే వినిపించగలుగుతున్నారు. ఈ రెండవశ్రేణి నాయకులెవరికీ నిర్ణయాధికారం లేదు. కేవలం శ్రోతలు మాత్రమే.
తాజాగా గురువారం సాయంత్రం మన సీమాంధ్ర కాంగ్రెస్ నాయకబృందం మళ్లీ దిగ్విజయ్ సింగ్ ను కలిసింది. షుమారు రెండుగంటలపాటు తమ ఆవేదనను వెళ్ళగక్కింది. తొందరపడి క్యాబినెట్ నోట్ పై నిర్ణయం గైకోనవద్దంటూ ప్రాధేయపడింది. అంతా విన్న డిగ్గిరాజా వారు ” భయపడకండి. ఆంటోని కమిటి నివేదిక వచ్చేవరకూ తెలంగాణా పై క్యాబినెట్ నోట్ తయారుకాదు ” అని అభయమిచ్చారు. దాంతో మన నాయకులు ఊపిరి పీల్చుకుని బైటికొచ్చేసి ఇదే విషయాన్ని మీడియా ముందు చెప్పేసి తామేదో ఘనకార్యం సాధించినట్టు పోజు పెట్టేశారు. విచిత్రమేమిటంటే సరిగ్గా దిగ్విజయ్ తో సమావేశం జరుగుతున్న సమయంలోనే కేంద్ర హొమ్ మంత్రి షిండే విలేకరులతో మాట్లాడుతూ ” తెలంగాణా పై క్యాబినెట్ నోట్ ముసాయిదా సిద్ధమై ఇంతకు ముందే నా దగ్గరకు వచ్చింది. నేను దానిని రేపు చూస్తాను. ఎటువంటి ఆలస్యం లేకుండా వెంటనే దానిని క్యాబినెట్ ముందు పెడతాము ” అంటూ ప్రకటించారు. ఇదే విషయాన్ని విలేకరులు ఆ తరువాత సీమాంధ్ర కాంగ్రెస్ నాయకులను అడిగితే వారు సమాధానం చెప్పలేక విలేకరులపై తమ తీవ్ర అసహనాన్ని ప్రదర్శించారు.