ఆంధ్రప్రదేశ్ రాష్ట్రంలోనూ కరోనా పాజిటివ్ కేసులు విపరీతంగా పెరిగిపోతున్నాయి. తాజాగా మరో 17 పాజిటివ్ కేసులు నమోదయ్యాయి. దీంతో రాష్ట్రంలో కరోనా కేసుల సంఖ్య 40కు చేరాయి. ప్రకాశం జిల్లాలో ఏకంగా 8 కేసులు.. గుంటూరు జిల్లాలో 5.. అనంతపురం 2.. తూర్పుగోదావరి, కృష్ణా జిల్లాల్లో ఒకటి చొప్పున కేసులు ఉన్నాయి. ఈ పాజిటివ్ కేసులన్నీ ఢిల్లీలో తబ్లిగి జమాత్‌కు వెళ్లి వచ్చిన వారే కావడం తో అంత భయంలో మునిగిపోయారు.
నిన్న రాత్రి 9 గంటల నుంచి ఈ రోజు ఉదయం వరకు 164 మందిని పరీక్షించగా 147 మందికి నెగటివ్ వచ్చిందని, మిగతా వారికి పాజిటివ్ వచ్చిందని ఏపీ ప్రభుత్వం మెడికల్ బులిటెన్ విడుదల చేసింది. కాగా, ఆంధ్రప్రదేశ్ వ్యాప్తంగా ఢిల్లీ మత ప్రార్థనలకు వెళ్లి వచ్చిన వారి వివరాలను ప్రభుత్వం విడుదల చేసింది. జిల్లాల వారీగా మొత్తం 711 మంది వివరాలను ప్రకటించింది. వారంతా త్వరగా ప్రభుత్వ ఆస్పత్రికి వెళ్లి చికిత్స చేయించుకోవాలని ఆదేశాలిచ్చింది.