లాక్ డౌన్ కారణంగా వైన్ షాప్స్ బంద్ కావడం తో మద్యం బాబుల కష్టాలు అన్ని ఇన్ని కావు..మద్యం దొరక్క నానా కష్టపడుతున్నారు. కొంతమందైతే మద్యం దొరక్క పిచ్చోళ్ళు అవుతున్నారు. ఇదే అదును చేసుకున్న దొంగలు ఏకంగా మద్యం షాప్ ను లూటీ చేస్తున్నారు. రీసెంట్ గా హైదరాబాద్ గాంధీ నగర్ ఏరియా లో దొంగలు షాప్ పై భాగంలో ఉండే రేకును కత్తిరించి షాపులోకి దూరి రూ.3 లక్షల విలువైన మద్యం బాటిళ్లను లూటీ చేశాడు. ఈ ఘటన వార్తల్లో ఇంకా చక్కర్లు కొడుతుండగానే తాజాగా విజయవాడ లో ఇలాంటి ఘటనే చోటు చేసుకుంది.
విజయవాడ వణుకూరులో ప్రభుత్వ మద్యం షాపును దుండుగులు లూటీ చేశారు. ఆదివారం అర్ధరాత్రి దుకాణం కిటికీ పగలగొట్టి లోపలికి చొరబడ్డ దొంగలు.. రూ.1.60లక్షల విలువైన మద్యం సీసాలు చోరీ చేశారు. ఈ దొంగతనం వీడియో సీసీ కెమెరాలో రికార్డైనట్లు తెలుస్తోంది. ఘటనపై కేసు నమోదు చేసిన పోలీసులు దర్యాప్తు ప్రారంభించారు. సీసీ ఫుటేజ్ ఆధారంగా నిందితుల్ని గుర్తించే పనిలో ఉన్నారు.
