దేశంలో కరోనా కేసుల సంఖ్య రోజురోజుకూ పెరుగుతోంది. గడిచిన 24 గంటల్లో కొత్తగా 826 పాజిటివ్‌ కేసులు నమోదైనట్లు కేంద్ర వైద్యారోగ్యశాఖ వెల్లడించింది. దీంతో దేశంలో మొత్తం కేసుల సంఖ్య 12,759కి చేరింది. గత 24 గంటల్లో 28 మంది మరణించగా.. ఇప్పటి వరకు మరణించిన వారి సంఖ్య 420కి చేరింది.
కాగ ప్రపంచ వ్యాప్తంగా 53 దేశాల్లో నివసిస్తున్న భారతీయుల్లో 3,336 మందికి కరోనా సోకిందని.. అందులో 25 మంది ప్రాణాలు కోల్పోయారని కేంద్ర ప్రభుత్వ వర్గాలు వెల్లడించాయి. భారత్‌లోనూ కరోనా విస్తృతంగా వ్యాప్తి చెందుతున్న నేపథ్యంలో అంతర్జాతీయ విమాన సర్వీసులన్నీ నిలిపివేసిన సంగతి తెలిసిందే. అందువల్ల విదేశాల్లో చిక్కుకున్న భారతీయులంతా పరిస్థితులు చక్కబడే వరకు సంయమనం పాటించాలని కేంద్రం ప్రభుత్వం కోరింది.
