ఆసిస్ తో జరుగుతున్న బాక్సింగ్‌ డే టెస్టులో టీమ్‌ఇండియా విజయానికి చేరువలో నిలిచింది. తొలి ఇన్నింగ్స్‌లో 326 పరుగులకు ఆలౌటైన భారత్‌.. రెండో ఇన్నింగ్స్‌లోనూ కంగారూలను మరోసారి కట్టడి చేసింది. 277/5 ఓవర్‌నైట్‌ స్కోరుతో మూడో రోజు ఆట ప్రారంభించిన టీమ్‌ఇండియా మరో 49 పరుగులు చేసి చివరి ఐదు వికెట్లు కోల్పోయింది. దాంతో ఆస్ట్రేలియాపై 131 పరుగుల తొలి ఇన్నింగ్స్‌ ఆధిక్యం సంపాదించింది.
ఇక రెండో ఇన్నింగ్స్‌లో భారీ లోటును పూరించి ఈ మ్యాచ్‌లో నిలవాలని చూసిన ఆసీస్‌కు ఆదిలోనే ఎదురుదెబ్బ తగిలింది. ఓపెనర్‌ జో బర్న్స్‌(4)ను ఉమేశ్‌ యాదవ్‌ నాలుగో ఓవర్‌లోనే ఔట్‌ చేసి భారత్‌కు శుభారంభం అందించాడు. ఆపై లబుషేన్‌(28), మాథ్యూవేడ్‌(48) కాసేపు వికెట్‌ కాపాడుకునే ప్రయత్నం చేశారు. అయితే, అశ్విన్‌ వేసిన ఓ చక్కటి బంతికి ప్రమాదకర లబుషేన్‌ పెవిలియన్‌ చేరాడు. స్లిప్‌లో రహానె చేతికి చిక్కాడు. దీంతో ఆసీస్‌ 99 పరుగులకే 6 వికెట్లు కోల్పోయి ఇన్నింగ్స్‌ ఓటమి దిశగా సాగింది. కట్టుదిట్టమైన బౌలింగ్ చేసి అదే జోరు కనబరిస్తే కనుక విజయం మన సొంతమే.
