మాస్ కా దాస్ విశ్వక్ సేన్, విద్యాధర్ కాగిత దర్శకత్వంలో చేస్తున్న ప్రతిష్టాత్మక చిత్రం ‘గామి’. ఈ అడ్వెంచర్ డ్రామాని వి సెల్యులాయిడ్ సమర్పణలో కార్తీక్ శబరీష్ నిర్మిస్తున్నారు. కలర్ ఫోటో ఫేమ్ చాందిని చౌదరి కథానాయికగా నటిస్తుంది. విశ్వక్ సేన్ అఘోరా పాత్రలో కనిపించనున్న ఈ చిత్రం మార్చి 8న ప్రపంచవ్యాప్తంగా గ్రాండ్ గా విడుదలౌతుంది. ఇప్పటికే విడుదలైన పోస్టర్స్, టీజర్, సాంగ్స్ ప్రేక్షకులను ఆకట్టుకోవడమే కాదు.. సినిమాపై హైప్ ను క్రియేట్ చేసాయి. తాజాగా ఈరోజు ఈ సినిమా ట్రైలర్ ను ప్రముఖ దర్శకుడు సందీప్ రెడ్డి వంగా రిలీజ్ చేసారు.
ట్రైలర్ ఆద్యంతం సస్పెన్స్, థ్రిల్లింగ్ అంశాలతో ఉత్కంఠభరితంగా సాగుతుంది. ‘నేను ఎంత ప్రయత్నించినా నేనెవరినో, ఎక్కడి నుంచి వచ్చానో, ఎంతకాలంగా ఈ సమస్యతో ఉన్నానో గుర్తుకు రావడం లేదు’ అంటూ విశ్వక్ సేన్ వాయిస్ తో ట్రైలర్ ప్రారంభమవుతుంది. కొందరు అఘోరాలు అతన్ని రక్షించారు. వారు తమ మంచి కోసం విశ్వక్ సేన్ ని ఆ స్థలాన్ని విడిచిపెట్టమని అడుగుతారు. ఇక హిమాలయాలలోని ఒక నిర్దిష్ట ప్రదేశంలో తన వ్యాధికి మందు దొరుకుతుందని.. నిర్దిష్ట గడువులో అక్కడికి చేరుకోకపోతే మరో 36 సంవత్సరాలు వేచి ఉండాలని చెప్తారు. మరోవైపు, ఏకకాలంలో ఒక దేవదాసి మరియు ఒక శాస్త్రవేత్త తన క్లినికల్ ట్రయల్స్ చేస్తున్న మరో రెండు కథలు కూడా చూపించబడ్డాయి.
విశ్వక్‌సేన్ తన అద్భుతమైన నటనతో మెస్మరైజ్ చేసాడు. ప్రతీ సీన్ హై లెవెల్లో వుంది. విజువల్స్, బ్యాక్ గ్రౌండ్ స్కోర్ అద్భుతంగా వున్నాయి. మొత్తానికి ట్రైలర్ సినిమాపై అంచనాలను మరింతగా పెంచింది. ఇకపోతే పిసిఎక్స్ ఫార్మాట్‌లో తొలిసారిగా విడుదలైన ట్రైలర్ ఇదే. నరేష్ కుమారన్ మరియు స్వీకర్ అగస్తి సంగీతం అందిస్తున్న ఈ చిత్రంలో హారిక పెడదా మరియు మహమ్మద్ సమద్ ఇతర ప్రముఖ తారాగణం.
