తమిళ ప్రముఖ హీరో విజయ్‌ సేతుపతి తెలుగులో కూడా బిజీ అవుతున్నాడు. చిరంజీవి 151వ చిత్రం సైరా నరసింహారెడ్డిలో కీలక పాత్రను పోషించిన విజయ్‌ సేతుపతి ఆ చిత్రం షూటింగ్‌ను ముగించుకున్నాడు. మొన్నటి వరకు తమిళ సినిమాల్లో నటించిన ఈయన కొన్ని రోజులుగా సైరా చిత్రం ప్రమోషన్స్‌లో పాల్గొంటున్నాడు. సైరా ప్రమోషన్స్‌ కూడా పూర్తి చేసుకున్న విజయ్‌ సేతుపతి ఇప్పుడు మెగా మూవీ ‘ఉప్పెన’లో నటిస్తున్నాడు.
మెగా బ్రదర్స్‌ మేనల్లుడు అయిన వైష్ణవ్‌ తేజ్‌ హీరోగా పరిచయం కాబోతున్న ‘ఉప్పెన’ చిత్రం షూటింగ్‌ ప్రారంభం అయ్యి చాలా రోజులు అయ్యింది. ఇలాంటి సమయంలో విజయ్‌ సేతుపతి నటించక పోవడంతో అసలు ఈ చిత్రంలో ఆయన ఉన్నాడా లేడా అనే అనుమానాలు వ్యక్తం అయ్యాయి. తాజాగా ఆ విషయమై క్లారిటీ ఇస్తూ చిత్ర షూటింగ్‌లో విజయ్‌ సేతుపతి పాల్గొంటున్నాడు. వైష్ణవ్‌ తేజ్‌ మరియు విజయ్‌ సేతుపతిల కాంబినేషన్‌లో కీలక సీన్స్‌ను చిత్రీకరిస్తున్నారు. ఈ చిత్రంలో విజయ్‌ సేతుపతి పాత్ర చాలా కీలకంగా ఉంటుందనే టాక్‌ వినిపిస్తుంది.
