నాని ప్రస్తుతం ఒక స్టార్‌ హీరో, ఈయనతో సినిమాలు చేయాలంటే దర్శకులకు క్రేజ్‌ ఉండటంతో పాటు మ్యాటర్‌ ఉండాలి. నాని సినిమాలపై ప్రేక్షకుల్లో అంచనాలు, ఆసక్తి పెరిగింది. అందుకే నాని తన సినిమాల ఎంపిక విషయంలో గతంలో కంటే ఇప్పుడు మరింత ఆసక్తిని, జాగ్రత్తను కనబర్చుతున్నాడు. నాని ప్రతి రోజు ఏదో ఒక కథ వింటూనే ఉంటాడు. అయితే అన్ని కథలను ఆయన ఓకే చేయడు. తనకు గతంలో సక్సెస్‌ ఇచ్చాడని లేదా మరో రకంగానో నాని ఇప్పుడు సినిమాల ఎంపిక విషయంలో నిర్ణయాన్ని తీసుకుంటే తప్పు చేసిన వాడు అవుతాడు.
సినిమాల విషయంలో చాలా జాగ్రత్త తీసుకుంటున్న నానిని తాతినేని సత్య ఒప్పించి మెప్పించి సినిమా చేస్తాను అంటూ ధీమాగా ఉన్నాడు. గతంలో నానితో ఈయన ‘భీమిలి కబడ్డీ జట్టు’ చిత్రాన్ని చేసిన విషయం తెల్సిందే. ఆ సినిమా సక్సెస్‌ కాకున్నా నానికి మంచి పేరు వచ్చింది. ఆ సినిమాతో నాని నటుడిగా ప్రూవ్‌ చేసుకున్నాడు. తాజాగా ఈ దర్శకుడు ‘వీడెవడు’ అనే చిత్రంతో ప్రేక్షకుల ముందుకు రాబోతున్నాడు. సచిన్‌ హీరోగా నటించిన ఈ సినిమా ప్రమోషన్‌లో భాగంగా తన తర్వాత సినిమా నానితో చేయాలనుకుంటున్నట్లుగా చెప్పుకొచ్చాడు. 
నాని కోసం కథ సిద్దంగా ఉందని, నాని ఒప్పుకుంటే చేసేస్తాను అంటూ చెబుతున్నాడు. కాని ప్రస్తుతం నాని వరుస చిత్రాలతో బిజీగా ఉన్నాడు. ఇప్పటికే మూడు సినిమాలకు కమిట్‌ అయ్యి ఉన్న నాని మరో మూడు నాలుగు సినిమాల చర్చలు జరుపుతున్నాడు. ఇలాంటి సమయంలో తాతినేని నానితో సినిమా చేస్తాడు అనుకోవడం పొరపాటే. అయితే ‘వీడెవడు’ సినిమా ఘన విజయం సాధిస్తే ఏమైనా నాని కరుణిస్తాడేమో చూడాలి.
