సూపర్‌ స్టార్‌ మహేష్‌బాబు కెరీర్‌లో మైలు రాయి చిత్రాన్ని చేరుకున్నారు. కొరటాల శివ ‘భరత్‌ అను నేను’ చిత్రం మహేష్‌బాబుకు 24వ చిత్రం. తన 25వ చిత్రాన్ని వంశీ పైడిపల్లి దర్శకత్వంలో చేస్తున్న విషయం తెల్సిందే. విభిన్న కథలను ఎంచుకుని సినిమాలను తెరకెక్కించే దర్శకుడు వంశీ పైడిపల్లి తాజాగా మరోసారి తెలుగులో ఎప్పుడు రాని సబ్జెక్ట్‌తో మహేష్‌బాబుతో సినిమా చేయబోతున్నాడు.
25వ చిత్రం చాలా ప్రత్యేకం మరియు అభిమానులకు ప్రతిష్టాత్మకం కనుక మహేష్‌బాబు విభిన్న చిత్రాన్ని చేయాలని ఈ కథను ఎంచుకోవడం జరిగింది. 25వ సినిమా అంటే ప్రతి విషయం కూడా ప్రత్యేకంగా ఉండాలి. అందుకే హీరోయిన్‌ను బాలీవుడ్‌ నుండి దిగుమతి చేసుకోవాలని మొదట భావించారు. కాని కథ మరియు కథనంకు తగ్గట్లుగా హీరోయిన్‌ ఉండాలి అంటే కీర్తి సురేష్‌ అయితే బాగుంటుందనే అభిప్రాయంను దిల్‌రాజు వ్యక్తం చేశాడు. 
ఈ చిత్రానికి ఒక నిర్మాత అయిన దిల్‌రాజు అభిప్రాయాన్ని దర్శకుడు వంశీ మరియు మరో నిర్మాత అశ్వినీదత్‌ మరియు హీరో మహేష్‌బాబులు కూడా ఓకే చేశారు. దాంతో కీర్తి సురేష్‌ను మహేష్‌25కు ఫైనల్‌ చేయడం జరిగింది. తమిళంలో పలు సూపర్‌ హిట్‌ చిత్రాలు చేసిన కీర్తి సురేష్‌ తెలుగులో ప్రస్తుతం ‘మహానటి’తో పాటు పవన్‌ కళ్యాణ్‌ సరసన ఒక చిత్రాన్ని చేస్తుంది. తాజాగా మహేష్‌తో కూడా ఛాన్స్‌ రావడంతో కీర్తి సురేష్‌ రేంజ్‌ పెరిగిపోయినట్లుగా చెప్పుకోవచ్చు.
