సన్నీ లియోన్ నటించిన మందిరా చిత్రంతో విజయవంతమైన ప్రారంభం ఇచ్చిన Viision Movie Makers, ఇప్పుడు మరో వినూత్నమైన ప్రేమకథా చిత్రంతో మళ్లీ ప్రేక్షకుల ముందుకు రాబోతున్నారు. ‘సుమతి శతకము’ అనే టైటిల్‌తో రూపొందుతున్న ఈ చిత్రం, కొమ్మలపాటి శ్రీధర్ సమర్పణలో, కొమ్మలపాటి సాయి సుధాకర్ నిర్మాణంలో తెరకెక్కుతోంది. ఈ చిత్రంతో ఎం.ఎం. నాయుడు దర్శకుడిగా పరిచయం అవుతుండగా, బిగ్‌బాస్ ఫేమ్ అమర్‌దీప్ చౌదరి మరియు సాయిలీ చౌదరి జంటగా నటిస్తున్నారు. అమరావతిలోని వైకుంఠపురం గ్రామ దేవస్థానంలో జరిగిన ఈ సినిమా గ్రాండ్ లాంచ్ వేడుకలో చిత్ర బృందంతో పాటు పలువురు ప్రముఖులు హాజరయ్యారు. ముహూర్తపు సన్నివేశానికి పేడకూరపాడు ఎమ్మెల్యే భాష్యం ప్రవీణ్ తొలి క్లాప్ ఇవ్వగా, వెన్న శంభశివ రెడ్డి కెమెరా స్విచ్ ఆన్ చేశారు. ఈ రోజు నుండి రెగ్యులర్ షూటింగ్ కూడా ప్రారంభమైంది.
ఈ ప్రేమకథకు బండారు నాయుడు కథను అందించగా, సంగీతాన్ని సుభాష్ ఆనంద్ స్వరపరుస్తున్నారు. హల్సేవామి సినిమాటోగ్రఫీ బాధ్యతలు చేపడుతున్న ఈ చిత్రానికి, సురేష్ విన్నకోట ఎడిటింగ్ చేస్తున్నాడు. ప్రేమ, పాంచాజన్య, మరియు యూత్‌ఫుల్ ఎంటర్టైన్‌మెంట్ మేళవించిన కథనంతో సుమతి శతకము ఓ ఫీల్‌గుడ్ మూవీగా రూపుదిద్దుకుంటోంది. తాజా కాన్సెప్ట్, క్రేజీ కాస్టింగ్, మరియు గొప్ప టెక్నికల్ టీమ్‌తో ఈ చిత్రం రొమాంటిక్ డ్రామా జానర్‌లో ఓ కొత్త శకం మొదలుపెట్టేలా కనిపిస్తోంది.
