టాలీవుడ్‌ జక్కన్న రాజమౌళి తెరకెక్కించిన ‘బాహుబలి’ చిత్రం ఏ స్థాయిలో రికార్డులను నమోదు చేసిందో ప్రత్యేకంగా చెప్పనక్కర్లేదు. కేవలం తెలుగులోనే కాకుండా విడుదలయిన అన్ని భాషల్లో కూడా రికార్డులు బ్రేక్‌ చేసి కొత్త చరిత్రను నమోదు చేసి జాతీయ స్థాయిలో గుర్తింపు పొందిన చిత్రంగా నిలిచింది. ఈ చిత్ర స్థాయిలో తమ చిత్రాలను కూడా చేయాలని పలువురు స్టార్‌ హీరోలు, స్టార్‌ దర్శకులు, స్టార్‌ నిర్మాతలు పోటీ పడుతున్నారు. ఇక ఈ చిత్ర రికార్డులను బ్రేక్‌ చేయాలని ఆపసోపాలు పడుతున్నారు.
సూపర్‌స్టార్‌ మహేష్‌ బాబు ప్రస్తుతం క్రేజీ దర్శకుడు మురుగదాస్‌ దర్శకత్వంలో ‘స్పైడర్‌’ చిత్రంలో నటిస్తున్నాడు. ఈ చిత్రాన్ని అగస్టు 8న మహేష్‌బాబు పుట్టిన రోజు సందర్భంగా విడుదల చేయాలని సన్నాహాలు చేస్తున్నారు. ఈ చిత్రం కోసం ఎంతగానో ఎదురుచూస్తున్న అభిమానులు ఇప్పటి నుండే అంచనాలను అమాంతం పెంచేసుకుంటున్నారు. త్వరలో ఈ చిత్ర తొలి టీజర్‌ను విడుదల చేయనున్నట్టు చిత్ర యూనిట్‌ తాజాగా ప్రకటించారు. ఈ చిత్రం మామూలు సినిమా కాదు, ఇది ‘బాహుబలి’ స్థాయిలోని సినిమా, ‘స్పైడర్‌’ అంటే ఆషామాషి కాదు అంటూ సూపర్‌స్టార్‌ అభిమానులు సోషల్‌ మీడియా వేదికగా ‘స్పైడర్‌’ను తెగ ప్రమోట్‌ చేస్తున్నారు.
