అందాలతార సమంత అక్కినేని వారసుడు నాగచైతన్యను పెళ్లాడి నాగార్జునకు పెద్ద కోడలు కాబోతుంది. ఈ ఏడాది చివరికల్లా సామ్‌, చైల పెళ్లి జరుగనుంది. ప్రస్తుతం సమంత, చైతన్య, నాగ్‌, అఖిల్‌లు సినిమాలతో చాలా బిజీగా ఉన్నారు. నాగ్‌, సమంతలు కలిసి కూడా ఓ చిత్రంలో నటిస్తున్నారు. ఓంకార్‌ దర్శకత్వంలో తెరకెక్కి విడుదలైన ‘రాజుగారి గది’ చిత్రానికి సీక్వెల్‌ను తెరకెక్కిస్తుండగా ఈ చిత్రంలో నాగ్‌ కీలక పాత్రలో నటిస్తున్నాడు. నాగ్‌ మోడ్రన్‌ మాంత్రికుడిగా నటిస్తున్న ఈ చిత్రంలో సమంత కూడా ఓ ముఖ్య పాత్రలో నటిస్తుందట. వైవిధ్యభరిత పాత్రలను ఎంపిక చేసుకునే సమంత మామ కోసమే ఈ చిత్రంలో నటిస్తుందట.
హార్రర్‌ నేపథ్యంలో తెరకెక్కుతున్న ఈ చిత్రంలో సమంత ఒక ఆత్మ రూపంలో కనిపిస్తుందట. మోడ్రన్‌ మాంత్రికుడిగా నటిస్తూ దెయ్యాల ఆట కట్టించే విధంగా నాగ్‌ ప్రయత్నాలు చేస్తుండగా ఆత్మ రూపంలో సమంత వచ్చి నాగ్‌కు చక్కలు చూపిస్తుందట. ఈ చిత్రంలో నాగ్‌ చాలా సీరియస్‌గా చేతిలో, మెడలో హారాలు ధరిస్తూ కనిపిస్తున్నాడు. అలా మాయలు, మంత్రాలు చేసే నాగ్‌ను సమంత ఆత్మ వచ్చి ముప్పు తిప్పలు పెడుతుందట. ఈ చిత్రం కథ చాలా బాగుండడం వల్లనే మామ కోడలు ఇద్దరు మరోసారి కలిసి నటిస్తున్నారు.
