పవన్‌ కళ్యాణ్‌ నిర్మాణంలో రామ్‌ చరణ్‌ ఒక సినిమా చేయబోతున్నాడు అంటూ రెండు సంవత్సరాలుగా ప్రచారం జరుగుతుంది. అయితే ఇప్పటి వరకు అందుకు సంబంధించిన చర్చలు కాని, సంప్రదింపులు కాని జరిగింది లేదు. దాంతో మెగా ఫ్యాన్స్‌ ఆ సినిమాపై ఆశలు వదులుకున్నారు. ఇక తాజాగా పవన్‌ కళ్యాణ్‌ మేనల్లుడు సాయిధరమ్‌ తేజ్‌తో సినిమా నిర్మించేందుకు సిద్దం అవుతున్నాడు అంటూ ప్రచారం జరుగుతుంది.
పవన్‌ కళ్యాణ్‌ క్రియేటివ్‌ వర్క్‌ బ్యానర్‌లో నితిన్‌ హీరోగా ఒక సినిమాను సుధాకర్‌ రెడ్డితో కలిసి పవన్‌ నిర్మిస్తున్నాడు. ఆ సినిమా అలా ఉండగానే సాయిధరమ్‌ తేజ్‌తో సొంతంగా ఒక సినిమాను నిర్మించాలని పవన్‌ భావిస్తున్నాడు. అందుకోసం ఒక దర్శకుడిని కూడా ఎంపిక చేసుకున్నాడు. ఆ యువ దర్శకుడు ప్రస్తుతం సాయి ధరమ్‌ తేజ్‌ కోసం స్క్రిప్ట్‌ వర్క్‌ చేస్తున్నట్లుగా తెలుస్తోంది. మామయ్య నిర్మాణంలో నటించేందుకు చాలా ఆసక్తిగా ఉన్నట్లుగా సాయిధరమ్‌ తేజ్‌ సన్నిహితులతో చెబుతున్నాడు. ఈ సినిమా ఇదే సంవత్సరంలో ప్రారంభం అయ్యి, వచ్చే సంవత్సరంలో ప్రేక్షకుల ముందుకు వచ్చే అవకాశాలున్నాయి. చరణ్‌తో కుదర్లేదు కాని సాయిధరమ్‌ తేజ్‌తో ఖచ్చితంగా పవన్‌ సినిమా నిర్మించడం ఖాయం అన్నట్లుగా తెలుస్తోంది.