కార్తికేయ గుమ్మకొండ కథానాయకుడిగా నటించిన సినిమా ‘బెదురులంక 2012’. లౌక్య ఎంట‌ర్‌టైన్‌మెంట్స్‌ పతాకంపై ప్రొడక్షన్ నంబర్ 3గా రవీంద్ర బెనర్జీ (బెన్నీ) ముప్పానేని నిర్మిస్తున్నారు. ఈ చిత్రానికి సి. యువరాజ్ చిత్ర సమర్పకులు. క్లాక్స్ దర్శకుడిగా పరిచయమవుతున్నారు. ఇందులో కార్తికేయ సరసన ‘డీజే టిల్లు’ ఫేమ్ నేహా శెట్టి కథానాయికగా నటించారు. తాజాగా ఈ సినిమా నుండి రొమాంటిక్ సాంగ్ ఒకటి రిలీజ్ అయింది. ‘వెన్నెల్లో ఆడపిల్ల…కవ్వించే కన్నెపిల్ల…కోపంలో చూస్తే ఎల్లా…క్షణంలో అగ్గిపుల్ల…’ అంటూ సాగే గీతాన్ని ఈరోజు విడుదల చేశారు. మెలోడీ బ్రహ్మ మణిశర్మ బాణీ అందించిన ఈ ‘వెన్నెల్లో ఆడపిల్ల…’ పాటకు కిట్టు విస్సాప్రగడ సాహిత్యం అందించారు. హారిక నారాయణ్, జెవి సుధాంశు ఆలపించారు. లెజెండరీ కొరియోగ్రాఫర్ బృందా మాస్టర్ నృత్య దర్శకత్వం వహించారు.
ఈ సందర్భంగా చిత్ర నిర్మాత బెన్నీ ముప్పానేని మాట్లాడుతూ “మణిశర్మ గారు అద్భుతమైన బాణీ అందించారు. ప్రేమ కథలోని కీలకమైన సందర్భంలో వస్తుందీ పాట. మణిశర్మ గారి బాణీకి తోడు కార్తికేయ, నేహా శెట్టి మధ్య కెమిస్ట్రీ, కెమెరా వర్క్ పాటలో హైలైట్ అవుతాయి. ‘వెన్నెల్లో ఆడపిల్ల…’ పాట విడుదలైన కొన్ని క్షణాల్లోనే ఫెంటాస్టిక్ రెస్పాన్స్ వచ్చింది. గోదావరి తీర ప్రాంతంలోని ఓ గ్రామంలో ఈ పాటను చిత్రీకరించాం. ఎనిమిది ఎకరాల రొయ్యల చెరువు మధ్య రాత్రి వేళల్లో తీసిన పాట ఇది. సినిమాలో హీరో హీరోయిన్ల జోడి చాలా ఫ్రెష్ గా ఉంటుంది. వాళ్ళిద్దరి మధ్య రొమాన్స్ సినిమాకి హైలైట్. అలాగే, కామెడీ కూడా! ఇది హిలేరియస్ ఎంటర్టైనర్. ఎంటర్టైనర్ ఆఫ్ థిస్ సీజన్ అని గర్వంగా చెబుతాం. ఇప్పటివరకు గోదావరి నేపథ్యంలో వచ్చిన రూరల్ డ్రామాలకు చాలా భిన్నంగా ఉంటుంది. గోదావరి బేస్డ్ రూరల్ డ్రామా అంటే ‘బెదురులంక 2012’ ఒక బెంచ్ మార్క్ సెట్ చేస్తుంది. ఇప్పటికే విడుదల చేసిన ప్రచార చిత్రాలు వినోదాత్మకంగా, వైవిధ్యంగా ఉన్నాయి అని ప్రేక్షకులు చెబుతున్నారు. ప్రస్తుతం నిర్మాణానంతర కార్యక్రమాలు చివరి దశలో ఉన్నాయి. త్వరలో విడుదల తేదీ వెల్లడిస్తాం. డిస్ట్రిబ్యూషన్ సర్కిల్స్ నుంచి మంచి ఆఫర్లు వస్తున్నాయి. బిజినెస్ క్రేజీగా జరుగుతోంది” అని చెప్పారు.
ఇక కార్తికేయ, నేహా శెట్టి జంటగా నటిస్తున్న ఈ సినిమాలో అజయ్ ఘోష్, రాజ్ కుమార్ కసిరెడ్డి, శ్రీకాంత్ అయ్యంగార్, ‘ఆటో’ రామ్ ప్రసాద్, గోపరాజు రమణ, ఎల్బీ శ్రీరామ్, సత్య, సురభి ప్రభావతి, కిట్టయ్య, అనితానాథ్, దివ్య నార్ని ప్రధాన తారాగణం. మణిశర్మ సంగీతం అందిస్తున్నారు.
