వర్మ నీకిది మరీ ఓవర్‌ ఇస్మార్ట్‌ అనిపించడం లేదా?

వివాదాల దర్శకుడు రామ్‌ గోపాల్‌ వర్మ ఏం చేసినా కూడా చాలా ప్రత్యేకంగా ఉంటుందని చెప్పడంలో ఎలాంటి సందేహం లేదు. తాజాగా ఈయన ఇస్మార్ట్‌ శంకర్‌పై పడి చేస్తున్న రచ్చ మామూలుగా లేదు. మొన్నటికి మొన్న బాహుబలి చిత్రం కంటే కూడా కబీర్‌ సింగ్‌ చిత్రం చాలా గొప్పది అంటూ ట్విట్టర్‌లో కామెంట్స్‌ చేసిన వర్మ తాజాగా ఇస్మార్ట్‌ శంకర్‌ సినిమా బ్లాక్‌ బస్టర్‌ బిగ్గెస్ట్‌ బ్లాక్‌ బస్టర్‌ అంటూ కామెంట్స్‌ చేస్తూ ఉన్నాడు. సరే కామెంట్స్‌ చేస్తే పర్వాలేదు కాని నైట్‌ పార్టీలో పిచ్చోడి మాదిరిగా షాంపైన్‌ బాటిల్‌ నెత్తిన గుమ్మరించుకోవడం, హీరోయిన్స్‌ నెత్తిన పోయడం వంటివి చేశాడు.

నిన్న రాత్రి రచ్చ రచ్చ చేసిన రామ్‌ గోపాల్‌ వర్మ నేడు మూసాపేట శ్రీరాములు థియేటర్‌కు బైక్‌పై సినిమా చూసేందుకు వెళ్లాడు. సినిమాను చూసేందుకు నార్మల్‌గా వెళ్తే పెద్దగా చర్చ జరిగేది కాదు. కాని వర్మ మాస్‌ ఆడియన్స్‌ ఎలా అయితే వెళ్తారో అలా మెడలో కర్చిఫ్‌ పెట్టుకుని, కాలుకు కర్చిఫ్‌ కట్టుకుని వెళ్లాడు. ఇక అక్కడ వరుసగా రెండు షోలు చూసేశాడు. మద్యలో ట్విట్టర్‌లో వర్మ… ఏయ్‌ జగన్‌గా, ఇలాంటి బ్లాక్‌బస్టర్స్‌ తీసే దమ్ముండి కూడా ఎందుకు తీయలేదు బాడకావ్‌? అంటూ మాస్‌గా ట్వీట్‌ చేశాడు. మొత్తానికి వర్మ మరీ ఓవర్‌గా ఇస్మార్ట్‌ ప్రమోషన్స్‌ చేస్తున్నాడంటూ కొందరు విమర్శలు చేస్తున్నారు.