మెగాపవర్‌స్టార్‌ రామ్‌చరణ్‌ ప్రస్తుతం సుకుమార్‌ దర్శకత్వంలో నటిస్తున్నాడు. పల్లెటూరి నేపథ్యంలో తెరకెక్కుతున్న ఈ చిత్రంలో చరణ్‌ చెవిటి వాడిగా, చేపలు పట్టే కుర్రాడిగా నటిస్తున్నాడు. దాంతో అభిమానులు కాస్త టెన్షన్‌ పడుతున్నారు. ప్రస్తుత ట్రెండ్‌ వేరు, చరణ్‌ చేస్తున్న ఈ చిత్రం వేరు. సుకుమార్‌తో చరణ్‌ చేస్తున్న ఈ చిత్రం ప్రయోగమే. ఈ ప్రయోగం క్లిక్‌ అవుతుందా అనేది విడుదలయ్యేదాకా చెప్పలేం. ఈ చిత్రంపై మెగా అభిమానులకు కూడా సందేహంగానే ఉంది. కానీ చరణ్‌ మాత్రం దృఢంగా ఉన్నాడు. ఈ చిత్రం తర్వాత చరణ్‌ మణిరత్నం దర్శకత్వంలో నటించనున్నాడు అని వార్తలు వచ్చాయి.
రామ్‌చరణ్‌ ఎప్పటి నుండో మణిరత్నం దర్శకత్వంలో నటించాలని ఆశపడుతున్నాడు. కానీ ఇంతవరకు అది పట్టాలెక్కలేదు. త్వరలో ఈ కాంభో రాబోతుంది అని మెగా అభిమానులు కూడా భావించారు. కానీ చరణ్‌ ఇప్పుడు మణిరత్నం చిత్రంలో నటించాలనుకోవడం లేదు. ఆయన తాజాగా తెరకెక్కించిన ‘చెలియా’ చిత్రం ఫ్లాపయింది. దాంతో చరణ్‌ ఆలోచనలో పడ్డాడు. ఇప్పుడు సుకుమార్‌ దర్శకత్వంలో చేసేది ఒక ప్రయోగం. వెంటనే మణిరత్నం దర్శకత్వంలో మరో ప్రయోగం చేస్తే రెండు బెడిసికొడితే కెరియర్‌కు పెద్ద దెబ్బ పడేలా ఉంది. అందుకే మణిరత్నంకు నో చెప్పి చెర్రీ మంచి పనే చేశాడు.
