టాలీవుడ్‌ జక్కన్న రాజమౌళి ఎంతో ప్రతిష్టాత్మకంగా తెరకెక్కించిన ‘బాహుబలి 2’ చిత్రం ప్రస్తుతం నిర్మాణానంతర కార్యక్రమాలను జరుపుకుంటుంది. ఇప్పటికే విడుదలయిన ఈ చిత్ర మొదటి పార్టుకు భారీ స్థాయిలో కలెక్షన్స్‌ వచ్చాయి. అంతేకాకుండా అంతర్జాతీయ స్థాయిలో గుర్తింపు కూడా లభించింది. దాంతో రెండో పార్టుపై అంచనాలు తారా స్థాయిలో ఉన్నాయి.
ఈ చిత్రాన్ని ప్రపంచవ్యాప్తంగా ఏప్రిల్‌ 28న విడుదల చేయనున్నారు చిత్ర యూనిట్‌. ఈ చిత్రంలో ప్రభాస్‌, అనుష్క జంటగా నటించగా రానా, తమన్నాలు ముఖ్య పాత్రల్లో నటించారు. మొదటి పార్టు క్లైమాక్స్‌లో కట్టప్ప బాహుబలిని ఎందుకు చంపుతాడు అనే రహస్యాన్ని ఉంచి ప్రేక్షకుల్లో ఇప్పటి వరకు కూడా ఆ ఉత్కంఠను అలాగే ఉండేలా చేశాడు రాజమౌళి.
కంక్లూజన్‌ పార్టు పూర్తి అయినా కూడా జక్కన చాలా కన్‌ఫ్యూజన్‌లో ఉన్నాడని సమాచారం. క్లైమాక్స్‌ కోసం రాజమౌళి ఇప్పటికే నాలుగు క్లైమాక్స్‌ సన్నివేశాలను చిత్రీకరించాడట. అయితే కన్‌క్లూజన్‌ విషయంలో జక్కన్న చాలా క్లారిటీగానే ఉన్నాడు కాని ఏదో కట్టప్ప బాహుబలిని ఎందుకు చంపాడో అనే విషయం తేలికగా ఉండకూడదని, యూనిట్‌కు కూడా ఆ విషయం తెలియకుండా పక్కా ప్లాన్‌తో నాలుగు క్లైమాక్స్‌ సన్నివేశాలను తెరకెక్కించినట్టు తెలుస్తోంది.
ఇదివరకు ఒకసారి కట్టప్ప బాహుబలిని ఎందుకు చంపాడు అనే విషయం ఊహించడం చాలా కష్టం అంటూ చెప్పుకొచ్చాడు. సీరియస్‌నెస్‌ క్రియేట్‌ చేయడం కోసమే జక్కన్న ఇలా చేస్తున్నాడు కాని ఆయనకు మొదటి నుండే ‘బాహుబలి’పై చాలా క్లారిటీ ఉందని ఫిల్మ్‌ వర్గాల నుండి సమాచారం అందుతోంది.
