యంగ్‌ రెబల్‌ స్టార్‌ ప్రభాస్‌ ప్రస్తుతం ‘సాహో’ చిత్రం ప్రమోషన్స్‌తో చాలా బిజీగా ఉన్నాడు. ఈయన వరుసగా హిందీ, తమిళం, తెలుగు ఇలా అన్ని భాషల మీడియా సంస్థలకు ఇంటర్వ్యూలు ఇస్తూ చాలా బిజీగా గడుపుతున్నాడు. తాజాగా తమిళ మీడియా సంస్థకు ఇంటర్వ్యూ ఇచ్చాడు. ఆ సమయంలో తమిళ సినిమా ఇండస్ట్రీకి సంబంధించిన అనేక విషయాల గురించి మాట్లాడాడు. తనకు తమిళంలో చాలా ఇష్టమైన హీరోలు రజినీకాంత్‌ మరియు కమల్‌ హాసన్‌ అన్నాడు. అలాగే ఇష్టమైన హీరోయిన్‌పై కూడా స్పందించాడు.
ప్రస్తుతం తమిళంలోనే కాకుండా సౌత్‌ ఇండియా మొత్తం కూడా క్రేజ్‌ను దక్కించుకున్న ముద్దుగుమ్మ నయనతార అంటే తనకు ప్రత్యేకమైన అభిమానం అంటూ ప్రభాస్‌ పేర్కొన్నాడు. తనకు ఇష్టమైన నయనతార సినిమాలు చూశానని అన్నాడు. ఆమె తెరపై కనిపించే తీరు మరియు ఆమె బాడీలాంగ్వేజ్‌ తనకు ఇష్టమని ఈ సందర్బంగా ప్రభాస్‌ పేర్కొన్నాడు. ప్రస్తుతం తమిళంతో పాటు తెలుగులో సైరా చిత్రంను చేస్తున్న నయనతార భవిష్యత్తులో ప్రభాస్‌తో కూడా నటిస్తుందేమో చూడాలి. గతంలో ప్రభాస్‌, నయనతారల కాంబోలో మూవీ వచ్చింది. మళ్లీ వీరి కాంబో మూవీ రాకకోసం ప్రేక్షకులు ఎదురు చూస్తున్నారు.
