దర్శకుడు తరుణ్‌ భాస్కర్‌ తెరకెక్కించిన తొలి చిత్రం ‘పెళ్లి చూపులు’తోనే మంచి గుర్తింపును సొంతం చేసుకున్నాడు. మొదటి చిత్రంతోనే ఈ దర్శకుడు జాతీయ అవార్డును సొంతం చేసుకున్నాడు. ఒకే చిత్రంతో ఇంత మంచి పేరు సంపాదించుకున్న తరుణ్‌ భాస్కర్‌ తదుపరి చిత్రంపై అంచనాలు తారా స్థాయిలో ఉన్నాయి. తాజాగా తరుణ్‌ భాస్కర్‌ తన తదుపరి చిత్రం గురించి మాట్లాడాడు. ఓ స్టార్‌ హీరోతో రెండో చిత్రాన్ని చేయబోతున్నాను అని క్లారిటీ ఇచ్చాడు. తరుణ్‌ భాస్కర్‌కు ఒకే చెప్పిన ఆ స్టార్‌ హీరో ఎవరా అనేది ఆసక్తిగా మారింది.
బాలీవుడ్‌ మిస్టర్‌ పర్‌ఫెక్ట్‌ అమీర్‌ఖాన్‌ నటించిన ‘దిల్‌ చహతా హై’ చిత్రంలాగా తన రెండో చిత్రం ఉండబోతుంది అని దర్శకుడు చిన్న హింట్‌ ఇచ్చాడు. ఈ కథలో ప్రేమ, హాస్యం రెండు సమానంగా ఉండబోతున్నాయని, వాటి కోసం ప్రస్తుతం తీవ్రంగా కసరత్తు చేస్తున్నానని దర్శకుడు చెప్పుకొచ్చాడు. ప్రస్తుతం ప్రీ ప్రొడక్షన్‌ పనులు జరుపుకుంటున్న ఈ చిత్ర అధికారిక సమాచారం త్వరలోనే ప్రకటిస్తాం అని తరుణ్‌ భాస్కర్‌ క్లారిటీ ఇచ్చాడు. లవ్‌ నేపథ్యంలో తెరకెక్కనున్న ఈ చిత్రంలో నటించడానికి ఒకే చెప్పిన ఆ స్టార్‌ హీరో ఎవరా అనే అంశంపై ఆసక్తి నెలకొంది.
