నేడు ప్రకటించిన జాతీయ అవార్డుల జాబితాలో ఉత్తమ నటిగా కీర్తి సురేష్‌ పేరున్న విషయం తెల్సిందే. మహానటి చిత్రంలో సావిత్రి పాత్రను పోషించిన కీర్తి సురేష్‌ను ఈ అవార్డు వరించింది. సావిత్రి పాత్రలో ఒదిగి పోయి నటించిన కీర్తి సురేష్‌కు ఈ అవార్డు రావడం సరైన నిర్ణయం అంటూ జాతీయ అవార్డు జ్యూరీని నెటిజన్స్‌ అభినందిస్తున్నారు. ఇక తాజాగా కీర్తి సురేష్‌కు జాతీయ అవార్డు రావడం పట్ల జనసేన అధినేత పవన్‌ కళ్యాణ్‌ ఆనందం వ్యక్తం చేశాడు.
జనసేన అధినేత పవన్‌ కళ్యాణ్‌ ఒక ప్రకటనలో మహానటి చిత్రంలో కీర్తి సురేష్‌ నటన అద్బుతంగా ఉంటుంది. ఈ అవార్డుకు ఆమె పూర్తిగా అర్హురాలు అంటూ చెప్పుకొచ్చాడు. జనసైనికుల తరపున మరియు నా తరపున కీర్తి సురేష్‌కు హృదయపూర్వక అభినందనలు తెలియజేస్తున్నట్లుగా పవన్‌ పేర్కొన్నాడు. రంగస్థలం, చిలసౌ మరియు అ! చిత్రాలకు కూడా జాతీయ అవార్డులు రావడం పట్ల పవన్‌ హర్షం వ్యక్తం చేసి శుభాకాంక్షలు తెలియజేశాడు. ఈసారి జాతీయ అవార్డుల జాబితాలో తెలుగు సినిమాలకు మంచి ప్రాముఖ్యత దక్కడం తెలుగు వారంతా కూడా ఆనందంలో ఉన్నారు.
