పవర్‌స్టార్‌ పవన్‌కళ్యాణ్‌ నటించిన ‘కాటమరాయుడు’ చిత్రం తాజాగా ప్రేక్షకుల ముందుకు వచ్చి మిశ్రమ స్పందనను సొంతం చేసుకుంది. ఈ చిత్రం తర్వాత పవన్‌ త్రివిక్రమ్‌తో నటించనున్నాడు అనేది అందరికి తెల్సిందే. వచ్చే నెల 7నుండి పవన్‌, త్రివిక్రమ్‌ల కొత్త చిత్ర షూటింగ్‌ ప్రారంభం కానుంది. త్రివిక్రమ్‌ తర్వాత పవన్‌ నేసన్‌ దర్శకత్వంలో నటించనున్నాడు. నేసన్‌తో పూర్తి అయ్యాక సంతోష్‌ శ్రీనివాస్‌ చిత్రంలో నటించడానికి ఇటీవలె గ్రీన్‌ సిగ్నల్‌ ఇచ్చాడు. ఇలా వరుసగా ఇప్పటికే ముగ్గురు దర్శకులకు ఒకే చెప్పిన పవన్‌ త్వరలో వినాయక్‌ దర్శకత్వంలో నటించనున్నాడు అని ఫిల్మ్‌ గనర్‌లో టాక్‌ వినిపిస్తుంది.
వినాయక్‌ చాలాసార్లు పవన్‌తో ఒక చిత్రాన్ని చేయడానికి ప్రయత్నాలు చేశాడు. కానీ ఏ ఒక్కటి కూడా ఫలించలేదు. తాజాగా పవన్‌ కోసం మరో కథను సిద్దం చేసి వినిపించడానికి రెడీ అవుతున్నట్టు ఫిల్మ్‌ నగర్‌ నుండి సమాచారం అందుతుంది. ఇప్పటికే మూడు చిత్రాలను లైనులో పెట్టిన పవన్‌ ఆ తర్వాత పూర్తి స్థాయి రాజకీయాల్లోకి ప్రవేశించనున్నాడు.
కాబట్టి వినాయక్‌ ఎంత మంచి కథ చెప్పినా కూడా అది ఫిక్స్‌ కావడం కాస్త అనుమానమే అని పవన్‌ సన్నిహితులు అంటున్నారు. ఏమో అసలే పవన్‌ సాహసప్రియుడు కాబట్టి వినాయక్‌కు కూడా డేట్స్‌ ఇచ్చే అవకాశం ఉంది అని మరికొందరు అంటున్నారు. వినాయక్‌ తన ప్రయత్నాలు తాను చేస్తున్నాడు. మరి అన్నకు హిట్‌ ఇచ్చిన వినాయక్‌తో తాను చేయడానికి పవన్‌ ఎలా స్పందిస్తాడో చూడాలి.
