సమంత ప్రధాన పాత్రలో నటించిన ‘ఓబేబీ’ చిత్రం తెలుగు ప్రేక్షకులను విపరీతంగా ఆకట్టుకుంది. ఎంటర్‌టైన్‌మెంట్‌తో పాటు ఎమోషన్‌ కూడా పండించిన చిత్రం అవ్వడంతో ఓబేబీ చిత్రానికి కాసుల వర్షం కురిసింది. తెలుగు రాష్ట్రాల్లో ఈ చిత్రం ఊహించిన దానికంటే దాదాపు రెట్టింపు వసూళ్లను నమోదు చేసింది. పెట్టుబడికి మూడు రెట్ల లాభంను నిర్మాతలు దక్కించుకున్నట్లుగా తెలుస్తోంది. ఇక ఓవర్సీస్‌లో ఈ చిత్రంను కేవలం కోటిన్నరకు కొనుగోలు చేసిన బయ్యర్లకు కాసుల వర్షం కురిసింది.
ఓబేబీ చిత్రం ఓవర్సీస్‌లో ఏకంగా మిలియన్‌ డాలర్లను వసూళ్లు చేసింది. స్టార్‌ హీరోల సినిమాలు మాత్రమే సాధించగల మిలియన్‌ మార్క్‌ను ఒక లేడీ ఓరియంటెడ్‌ మూవీ సునాయాసంగా దక్కించుకుంది. లేడీ ఓరియంటెడ్‌ మూవీ అనే విషయాన్ని పక్కన పెట్టి ఈ చిత్రానికి ఓవర్సీస్‌ ప్రేక్షకులు బ్రహ్మరథం పట్టారు. తాజాగా సినిమాను ఓవర్సీస్‌లో విడుదల చేసిన బయ్యర్లు అధికారికంగా మిలియన్‌ మార్క్‌ విషయాన్ని ప్రకటించారు. ఇంత పెద్ద విజయాన్ని అందించినందుకు గాను ఫ్యాన్స్‌ మరియు ప్రేక్షకులకు కృతజ్ఞతలు తెలియజేయడం జరిగింది.
