సింహాద్రి 2003 లో యంగ్ టైగర్ ఎన్టీఆర్ హీరోగా, ఎస్. ఎస్. రాజమౌళి దర్శకత్వంలో విడుదలైన విజయవంతమైన చిత్రం. అప్పట్లో ఎంత పెద్ద సంచలనం సృష్టించిందో ప్రత్యేకించి చెప్పనవసరం లేదు. సింగమలై అంటూ అభిమానులు థియేటర్‌లలో చేసిన రచ్చ అంతా ఇంతా కాదు. అయితే ప్రస్తుతం పాత సినిమాలు రీ రిలీజ్ అనేది ఒక ట్రెండ్ గా మారింది. ఇప్పుడు ఈ సినిమా కూడా రీ రీలీజ్‌కు సిద్ధమైంది.
ఎన్టీఆర్ బర్త్ డే సందర్భంగా ఈ సినిమా శనివారం 4K ప్రింట్‌తో రీ రిలీజ్ కానుంది. కాగా ఈ మూవీ దాదాపు వెయ్యి స్క్రీన్‌లలో విడుదల కాబోతుంది. అంతేకాదు రీ రిలీజ్ కు కూడా ప్రీ రిలీజ్ ఈవెంట్ జరుపుకున్న సినిమా సింహాద్రి కావడం మరో విశేషం. ఈ ఈవెంట్‌కు విశ్వక్‌తో పాటు మైత్రీ నవీన్‌, గోపిచంద్‌ మలినేని అతిథులుగా వచ్చి ప్రీ రిలీజ్ ఈవెంట్‌ను గ్రాండ్‌గా జరిపారు. అయితే ఇప్పటివరకు రీ రిలీజ్ ట్రెండులో టాప్ లిస్టులో పవర్ స్టార్ పవన్ కళ్యాణ్ ఖుషి సినిమా కొనసాగుతోంది. మరి ఈ సినిమా రికార్డును ఈసారి సింహాద్రి సినిమా బ్రేక్ చేస్తుందా లేదా అనేది ఆసక్తిగా మారింది. ఇక ఓవర్సీస్‌లోనూ భారీ స్థాయిలో రీ-రిలీజ్‌ను ప్లాన్‌ చేస్తున్నారు. ఇక థియేటర్‌ల వద్ద ఫ్యాన్స్‌ సందడి ఒక రేంజ్ లో వుంది.