నాగార్జున హీరోగా రాహుల్‌ రవీంద్రన్‌ దర్శకత్వంలో తెరకెక్కుతున్న ‘మన్మధుడు 2’ చిత్రం షూటింగ్‌ కార్యక్రమాలు ముగించుకుంది. ఆగస్టు 9న ప్రేక్షకుల ముందుకు రాబోతున్న ఈ చిత్రం ప్రమోషన్‌ కార్యక్రమాలు మొదలు అయ్యాయి. ఇప్పటికే నాగార్జున మరియు రకుల్‌ల వేరు వేరు టీజర్‌లు విడుదల అయ్యాయి. ఇక తాజాగా ట్రైలర్‌ విడుదలకు ఏర్పాట్లు జరుగుతున్నాయి. ట్రైలర్‌ విడుదల కోసం ఏర్పాట్లు పూర్తి చేసినట్లుగా సమాచారం అందుతోంది. సినిమాపై ఆసక్తి కలిగించేలా ట్రైలర్‌ ఉండాలనే ఉద్దేశ్యంతో చాలా భిన్నంగా ట్రైలర్‌ను కట్‌ చేశారట.
ఇప్పటికే టీజర్‌లతో సినిమా ఏంటీ ఎలా ఉండబోతుంది అందులోని పాత్రలు ఏంటీ అనే విషయమై క్లారిటీ వచ్చింది. అయితే ట్రైలర్‌లో కథను కాస్త రివీల్‌ చేసి సస్పెన్స్‌ కలిగించేలా ఉంటుందట. ఈనెల 25వ తారీకున ట్రైలర్‌ను విడుదల చేయబోతున్నారు. ఈ నెల చివరిలో ప్రీ రిలీజ్‌ వేడుక కూడా జరిపే అవకాశం ఉంది.
