సూపర్‌ స్టార్‌ మహేష్‌బాబు ప్రస్తుతం మురుగదాస్‌ దర్శకత్వంలో ఒక సినిమా చేస్తున్న విషయం తెల్సిందే. వంద కోట్లకు పైబడిన బడ్జెట్‌తో ఆ సినిమా తెరకెక్కుతుంది. చాలా నెలలుగా ఎంతో రహస్యంగా ఆ చిత్రాన్ని చిత్రీకరిస్తున్నారు. ఇప్పటి వరకు ఆ సినిమాకు సంబంధించిన ఎలాంటి అధికారిక సమాచారం బయటకు రాలేదు. కనీసం టైటిల్‌ను కూడా ఇంకా ప్రకటించలేదు. ఇప్పటికే చిత్ర యూనిట్‌ సభ్యులు ఒక టైటిల్‌ అనుకున్నారు. అయితే దాన్ని ప్రకటించలేదు. దాంతో మీడియా మరియు ప్రేక్షకులు మహేష్‌బాబు మూవీ టైటిల్‌ గురించి రకరకాలుగా ప్రచారం చేస్తున్నారు.
ఇప్పటి వరకు మహేష్‌బాబు మూవీ టైటిల్స్‌ అంటూ ‘సంభవామి యుగేయుగే’, ‘చట్టంతో పోరాటం’, ‘న్యాయ పోరాటం’, ‘అభిమన్యు’, ‘ఎనిమి’, ‘మర్మం’ ఇలా ఎన్నో టైటిల్స్‌ ప్రచారం జరిగాయి. అయితే చిత్ర యూనిట్‌ సభ్యులు మాత్రం అధికారికంగా ప్రకటించలేదు. విశ్వసనీయంగా అందుతున్న సమాచారం ప్రకారం మహేష్‌బాబు మూవీ టైటిల్‌ను మరో వారం రోజుల్లో అనౌన్స్‌ చేసి ఫస్ట్‌లుక్‌ పోస్టర్‌ను విడుదల చేయబోతున్నారు. ఇదే నెల చివర్లో చిత్ర టీజర్‌ను కూడా విడుదల చేసేందుకు మురుగదాస్‌ సిద్దం అవుతున్నాడు. చిత్రాన్ని జూన్‌ 23న తెలుగు, హిందీ మరియు తమిళ భాషల్లో విడుదల చేసేందుకు ఏర్పాట్లు చేస్తున్నారు.