వరుసగా విజయాలతో దూసుకు పోతున్నాడు నిఖిల్‌ తాజాగా ‘కేశవ’ అనే చిత్రాన్ని చేస్తున్న విషయం తెల్సిందే. నిఖిల్‌కు ‘స్వామిరారా’ వంటి బ్లాక్‌ బస్టర్‌ సక్సెస్‌ను ఇచ్చి మళ్లీ ఇన్నాళ్లకు నిఖిల్‌తో దర్శకుడు సుధీర్‌ వర్మ ఈ చిత్రాన్ని తెరకెక్కించడం జరిగింది. విభిన్న కథాంశాలను ఎంచుకుని, ప్రేక్షకులను ఆకట్టుకునేలా చిత్రాలు చేసే సుధీర్‌ వర్మ తాజాగా ‘కేశవ’ చిత్రంతో మరోసారి ప్రేక్షకులను ఆకట్టుకోవడం ఖాయంగా కనిపిస్తుంది. తాజాగా ఈ సినిమా టీజర్‌ను ప్రేక్షకుల ముందుకు తీసుకు వచ్చారు.
ఈ చిత్రంపై మొదటి నుండి కూడా అంచనాలు ఒక రేంజ్‌లో ఉన్నాయి. ఆ అంచనాలకు ఏమాత్రం తగ్గకుండా ఈ చిత్రం ఉంటుందని ఈ టీజర్‌తోనే దర్శకుడు చెప్పకనే చెప్పాడు. ఆసక్తికర కథాంశం మరియు విజువల్స్‌తో సినిమా ప్రేక్షకులను థ్రిల్‌ చేయడం ఖాయం అని టీజర్ చూస్తుంటే అనిపిస్తుంది. ఇక మాస్ లుక్‌లో నిఖిల్‌ పిచెక్కించేలా ఉన్నాడు. ఆకట్టుకునే బాడీ లాంగ్వేజ్‌తో ఉన్న నిఖిల్‌కు ఈ సినిమా మరో విజయాన్ని అందిస్తుందని టీజర్ చెప్పకనే చెబుతుంది. త్వరలోనే ఈ చిత్రాన్ని విడుదల చేస్తామని అభిషేక్‌ పిక్చర్స్‌ అధినేత చెప్పుకొచ్చారు. ఈ చిత్రంలో నిఖిల్‌కు జోడీగా రీతూ వర్మ నటించిన విషయం తెల్సిందే.
