‘లోకనాయకుడు’ కమల్‌హాసన్‌ సంచలన నిర్ణయం తీసుకున్నారు. తన నటనతో యావత్‌ భారతీయ సినీ ప్రేక్షక లోకాన్నీ ఆకట్టుకున్న కమల్ ఇక సినిమాలకు స్వస్తి చెప్పారు. త్వరలో పార్టీని స్థాపించి రాజకీయ రంగ ప్రవేశం చేయనున్నట్లు ఇప్పటికే కమల్‌హాసన్‌ ప్రకటించారు. ఈ నేపథ్యంలో సినిమాలకూ స్వస్తి పలకనున్నారట. తాజాగా ఇచ్చిన ఓ ఇంటర్వ్యూలో ఈ విషయం వెల్లడించారు.
‘‘ఇక నా నుంచి రెండు సినిమాలు మాత్రమే వస్తాయి. ఆ తర్వాత నా సినిమాలు రావు. నిజాయతీతో జీవిస్తూ ఏదో ఒకటి చేయాలనుకుంటున్నా. కానీ, ఓడిపోతానన్న ఆలోచనే లేదు. నాకు ఏ రాజకీయ పార్టీతోనూ అనుబంధంలేదు. నాకు ఒక సైన్యం ఉంది. ఇంకా చాలా మంది నా వెంట నడుస్తారనే నమ్మకం ఉంది. ఇంక ప్రజల్లో వుండి సేవ చేసుకోవడమే నా జీవిత లక్ష్యం” అని చెప్పుకొచ్చారు కమల్.
