‘మహానటి’ తర్వాత స్వప్న సినిమాస్‌ బ్యానర్‌పై రూపొందుతోన్న ఔట్‌ అండ్‌ ఔట్‌ ఎంటర్టైనర్ ‘జాతి రత్నాలు’. ‘మహానటి’ దర్శకుడు నాగ్‌అశ్విన్‌ ఈ చిత్రంతో నిర్మాతగా మారుతున్నారు. నవీన్‌ పొలిశెట్టి, ప్రియదర్శి, రాహుల్‌ రామకృష్ణ ప్రధాన పాత్రధారులుగా నటిస్తున్నారు. అనుదీప్‌ కె.వి దర్శకత్వం.
ఇప్పటికే `చిట్టీ… నా బుల్ బుల్ చిట్టీ` అనే పాట బాగా పాపుల‌ర్ అయ్యింది. ఇప్పుడో టీజర్ విడుద‌ల చేశారు. ఖైదీ నెంబ‌ర్ 201, 420, 840.. అంటూ ముగ్గురు హీరోల్నీ తీవ్ర వాదుల టైపులో చూపించారు. అయితే… ఇదంతా కామెడీ కోస‌మే అని ఆ త‌ర‌వాత అర్థం అవుతుంది. `స‌ర్ప‌రోష్ కీ దిల్ మే త‌మ‌న్నా, స‌మంత.. ర‌ష్మికా… ఓ తీనో మీరో సాత్ మే హై` అంటూ.. ఓ డైలాగ్ తో… కామెడీ పుట్టించాడు.. ప్రియదర్శి.
`మ‌న ముగ్గురిలో ఒక‌డు చ‌చ్చిపోయినా ఫ‌ర్వాలేదు. మిగిలిన ఒక్క‌డు సంతోషంగా ఉంటే చాలు..` అని అంత‌లోనే… `మీ ఇద్ద‌రిలో ఆ ఒక్క‌డెవ‌డో డిసైడ్ అవ్వండ్రా` అంటూ ఫైన‌ల్ ఝ‌ల‌క్ ఇచ్చాడు. 5వేల కోట్ల చుట్టూ తిరిగే క‌థ ఇది. ఆ 5 వేల కోట్లు ఎవ‌రికి ద‌క్కాయో, అందుకోసం ఈ జాతి రత్నాలు ఏం చేశారో తెర‌పై చూడాలి.
