దివంగత తమిళనాడు మాజీ ముఖ్యమంత్రి, అలనాటి సినీతార జయలలిత బయోపిక్‌లు ముస్తాబవుతున్నాయి. ఈమె కథతో సినిమా తెరకెక్కించడానికి చాలామంది దర్శకనిర్మాతలు ముందుకు వచ్చారు. ఎవరికి తోచినట్టు వారు అమ్మ బయోపిక్‌ను చిత్రీకరిస్తున్నారు. దర్శకుడు విజయ్‌ తెరకెక్కించే చిత్రంలో అమ్మ పాత్రలో ప్రముఖ బాలీవుడ్‌ తార కంగనా రనౌత్‌ కనిపించనుంది. ఇప్పటికే పలు ప్రతిష్టాత్మక చిత్రాల్లో నటించి మెప్పించిన ఈ అమ్మడు జయలలిత పాత్రలో కూడా బాగా మెప్పించగలదు అని ప్రేక్షకులు భావిస్తున్నారు. అయితే ఈ చిత్రంలో జయలలిత వివిధ రంగాల్లో సాధించిన ఘనత మరియు రకరకాల గెటప్‌లలో కంగనాను చూపించనున్నారు.
ఒక్కో వయస్సులో అమ్మ ఎలా ఉందో చూపించాలంటే మంచి మేకప్‌మెన్‌ అవసరం. అందుకే హాలీవుడ్‌లో బాగా పాపులర్‌ అయిన జాసన్‌ కొలిన్స్‌ ఈ చిత్రంకు ఎంపిక చేశారు. ఈయన మేకప్‌లో దిట్ట. అందుకే అమ్మ పాత్రను చూపించడానికి ఇలాంటి ఎక్స్‌పర్ట్‌లు అవసరం అని భావించిన యూనిట్‌ హాలీవుడ్‌ నిపుణులను ఎంపిక చేశారు. ఈ చిత్రాన్ని అక్టోబర్‌ చివరి వారంలో సెట్స్‌ మీదకు తీసుకెళ్లేందుకు సన్నాహాలు జరుగుతున్నాయి. దీనికి ప్రముఖ రచయిత విజయేంద్ర ప్రసాద్‌ కథను సిద్దం చేస్తున్నారు. తమిళంలో ‘తలైవి’, హిందీలో ‘జయ’గా ఈ చిత్రం తెరకెక్కనుంది.
