హీరోగా గోపీచంద్‌ గత కొన్ని సంవత్సరాలుగా సక్సెస్‌ అనేది ఎరిగి ఉండడు. అలాంటి గోపీచంద్‌ ఫలితాలతో సంబంధం లేకుండా వరుసగా చిత్రాలు చేస్తూనే ఉన్నాడు. తాజాగా తన 28వ చిత్రాన్ని గోపీచంద్‌ కన్ఫర్మ్‌ చేశాడు. త్వరలో ఛాణక్య చిత్రంతో ప్రేక్షకుల ముందుకు రాబోతున్న గోపీచంద్‌ తన తదుపరి చిత్రాన్ని సంపత్‌ నంది దర్శకత్వంలో చేయాలని నిర్ణయించుకున్నాడు. వీరిద్దరి కాంబో మూవీ అధికారికంగా ప్రకటన కూడా వచ్చేసింది.
గోపీచంద్‌, సంపత్‌ నందిల కాంబినేషన్‌లో గతంలోనే ‘గౌతమ్‌ నంద’ చిత్రం వచ్చిన విషయం తెల్సిందే. ఆ చిత్రం నిరాశ పర్చింది. డిజాస్టర్‌ కాకున్నా కూడా సినిమా మాత్రం ఒక మోస్తరుగా ఆడింది. ఇప్పుడు మరోసారి వీరిద్దరు కలిసి అదృష్టంను పరీక్షించుకోబోతున్నారు. ఈ చిత్రాన్ని యూటర్న్‌ చిత్రాన్ని నిర్మించిన శ్రీనివాస చిట్టూరి నిర్మించబోతున్నాడు. గోపీచంద్‌ కోసం ఒక విభిన్నమైన కథను ఇప్పటికే దర్శకుడు సంపత్‌ నంది తయారు చేశాడట. దసరా తర్వాత చిత్రం పట్టాలెక్కే అవకాశం ఉందని సినీ వర్గాల ద్వారా సమాచారం అందుతోంది. ఈ చిత్రంలో హీరోయిన్‌ ఎవరు అనే విషయమై త్వరలో క్లారిటీ రాబోతుంది.
