స్టయిలిష్‌ స్టార్‌ అల్లు అర్జున్‌ ప్రస్తుతం హరీష్‌ శంకర్ దర్శకత్వంలో ‘దువ్వాడ జగన్నాథమ్‌’ చిత్రంలో నటిస్తున్నాడు. ఈ చిత్ర షూటింగ్‌ దాదాపు పూర్తి కావొచ్చింది. ఇక బన్నీ తదుపరి చిత్రానికి సన్నాహాలు కూడా ప్రారంభం అయ్యాయి. బన్నీ తదుపరి చిత్రాన్ని వక్కంతం వంశీ దర్శకత్వంలో చేయనున్నాడు. చాలా రోజులుగా వంశీ బన్నీ కోసం మంచి కథను తయారు చేస్తూ వస్తున్నాడు. కుటుంభ కథ చిత్రంగా ‘నా పేరు సూర్య నా ఇల్లు ఇండియా’ అనే టైటిల్‌తో ఈ చిత్రం తెరకెక్కనుంది. టైటిల్‌తోనే బన్నీ ఈ చిత్రంపై ప్రేక్షకులకు ఆసక్తి నెలకొంటుంది. ‘డీజే’ పనులు పూర్తి కాగానే వెంటనే ఈ చిత్రాన్ని సెట్స్‌ మీదకు తీసుకెళ్లనున్నారు.
ఈ చిత్రంలో బన్నీ ఓ పవర్‌ఫుల్‌ పాత్రలో కనిపించనున్నాడట. తాజాగా ఈ చిత్రం గురించి ఆసక్తికర వార్త ఒకటి ఫిల్మ్‌ నగర్‌లో హల్‌చల్‌ చేస్తోంది. ఈ చిత్రంలో ఓ కీలకమై పాత్ర ఉంటుందట. అది సినిమా మొత్తానికి ప్లస్‌ అయ్యేవిధంగా ఉంటుందట. అందుకే ఆ కీలక పాత్రలో మెగాస్టార్‌ నటిస్తే సినిమాకు ప్రత్యేక ఆకర్షణగా ఉంటుంది అని దర్శకుడు బన్నీకి సూచించాడు. దాంతో బన్నీ తన ప్రపోజల్‌ను మామ ముందు ఉంచగా చిరు ఆలోచనలో పడ్డాడట. ఎలాగు సినిమాకు చాలా కీలకమైన పాత్ర కాబట్టి, బన్నీ కోసం చిరు ఈ చిత్రంలో నటించడానికి రెడీ అయినట్టే అని తెలుస్తోంది. అయితే ఈ విషయమై చిత్ర యూనిట్‌ సభ్యుల నుండి ఏ సమాచారం లేదు.
