‘బాహుబలి’ చిత్రంతో యంగ్‌ రెబల్‌ స్టార్‌ ప్రభాస్‌ భారీ స్థాయిలో క్రేజ్‌ను దక్కించుకున్నాడు. ఒక్క టాలీవుడ్‌లోనే కాకుండా బాలీవుడ్‌ మరియు కోలీవుడ్‌లో కూడా స్టార్‌ ఇమేజ్‌ను సొంతం చేసుకున్నాడు. అందుకే ‘బాహుబలి 2’ తర్వాత ప్రభాస్‌ నటించబోతున్న సినిమాను బాలీవుడ్‌ స్థాయిలో నిర్మించేందుకు ప్రయత్నాలు జరుగుతున్నాయి. యూవీ క్రియేషన్స్‌ బ్యానర్‌లో ఈ చిత్రాన్ని వంశీ మరియు ప్రమోద్‌లు నిర్మిస్తున్నారు. వంద కోట్లకు పైగా బడ్జెట్‌తో ఈ సినిమాను సుజీత్‌ తెరకెక్కిస్తున్నాడు. ఇక ఈ సినిమా కోసం ఇద్దరు బాలీవుడ్‌ స్టార్స్‌ను విలన్స్‌గా ఎంపిక చేయడం జరిగింది. హీరోయిన్‌గా కూడా బాలీవుడ్‌ స్టార్‌ హీరోయిన్‌ను ఎంపిక చేసేందుకు ప్రయత్నాలు జరుగుతున్నాయి.
ప్రభాస్‌ కొత్త సినిమాలో విలన్స్‌గా నటించేందుకు వివేక్ ఒబెరాయ్‌ మరియు జాకీ ష్రాఫ్‌ు ఓకే చెప్పారు. అయితే బాలీవుడ్‌కు చెందిన ఇద్దరు ముగ్గురు హీరోయిన్స్‌ కూడా ప్రభాస్‌తో నటించేందుకు నో చెప్పినట్లుగా తెలుస్తోంది. కొత్త దర్శకుడు అవ్వడంతో పాటు ప్రభాస్‌కు ‘బాహుబలి’ తప్ప ఆ స్థాయిలో మరే సినిమాలు లేవనే ఉద్దేశ్యంతో ఆ హీరోయిన్స్‌ నో చెప్పినట్లుగా తెలుస్తోంది. దాంతో కొత్త హీరోయిన్‌ లేదా సౌత్‌లోనే స్టార్‌ హీరోయిన్‌ను ప్రభాస్‌కు జోడీగా ఎంపిక చేసే అవకాశాలు కనిపిస్తున్నాయి. ఇటీవలే నిర్మాత వంశీ ‘కంచె’ హీరోయిన్‌ ప్రగ్యా జైస్వాల్‌తో సంప్రదింపులు జరిపినట్లుగా వార్తలు వస్తున్నాయి. ఆ విషయమై అధికారిక క్లారిటీ రావాల్సి ఉంది.
