బాలీవుడ్‌లో హీరోగా తనకంటూ మంచి గుర్తింపును సొంతం చేసుకుని, వెండితెర గ్లామర్‌ను మరింతగా పెంచేసిన నటుడు వినోద్‌ ఖన్నా ఇకలేరు. గతకొంత కాలం నుండి క్యాన్సర్‌ వ్యాధితో బాదపడుతున్న ఈయన ముంబైలో తుది శ్వాస విడిచాడు. 70 సంవత్సరాల వయస్సు ఉన్న వినోద్‌ ఖన్నా సినీ, రాజకీయ రంగంలో తనకంటూ మంచి గుర్తింపును సొంతం చేసుకున్నాడు. పూర్తిగా అనారోగ్యం పాలైన వినోద్‌ ఖన్నా బక్కచిక్కిన ఫొటోలు కొన్ని సోషల్‌ మీడియాలో బాగా వైరల్‌ అయ్యాయి. హిందీలో మన్మధుడికి కేరాఫ్‌ అడ్రస్‌గా నిలిచిన వినోద్‌ ఖన్నాను అలా చూసిన ఆయన అభిమానులు షాకయ్యారు.
హీరోగా, నిర్మాతగా ఎన్నో సక్సెస్‌ చిత్రాలను వెండి తెరకు పరిచయం చేసిన వినోద్‌ ఖన్నా స్టార్‌ హీరోల తండ్రి పాత్రలను కూడా పోషించి చివర వరకు సినీ ఇండస్ట్రీలో తనదైన ముద్రను వేసుకున్నారు. కొన్ని దశాబ్దాల నుండి ప్రేక్షకులను ఎంటర్టైన్‌ చేయడానికి తనవంతుగా ప్రయత్నాలు చేసిన వినోద్‌ ఖన్నాకు బాలీవుడ్‌ సినీ ప్రముఖులు నివాళులు అర్పిస్తున్నారు. ఇతర భాషల్లోని సినీ ప్రముఖులు కూడా ఈయన ఆత్మకు శాంతి కలగాలని కోరుకుంటున్నారు. వినోద్‌ఖన్నా ఆత్మకు శాంతి చేకూరాలని మనం కూడా కోరుకుందాం.
