తెలుగు ప్రేక్షకులతో పాటు దేశ వ్యాప్తంగా ప్రేక్షకులు ఎప్పుడెప్పుడా అని ఎదురు చూస్తున్న ‘బాహుబలి 2’ చిత్రం వచ్చే నెల 28న ప్రేక్షకుల ముందుకు రాబోతున్న విషయం తెల్సిందే. ఇప్పటికే షూటింగ్‌ పూర్తి చేసిన జక్కన్న ప్రస్తుతం పోస్ట్‌ ప్రొడక్షన్‌ వర్క్‌ను చేయిస్తున్నాడు. మరో వైపు చిత్ర ప్రమోషన్‌ వ్యవహారాలు కూడా చూస్తున్నాడు. బాహుబలి సంచలన విజయం సాధించిన నేపథ్యంలో రెండవ పార్ట్‌కు కూడా భారీ క్రేజ్‌ను తీసుకు వచ్చేలా పబ్లిసిటీ చేయబోతున్నారు.
పబ్లిసిటీలో భాగంగా ఈ చిత్రం ఆడియో వేడుకను రామోజీ ఫిల్మ్‌ సిటీలో వేసిన మహిష్మత సామ్రాజ్యంలో నిర్వహించేందుకు జక్కన్న ప్లాన్‌ చేస్తున్నట్లుగా ప్రచారం జరుగుతుంది. అయితే విశ్వసనీయంగా అందుతున్న సమాచారం ప్రకారం రామోజీ ఫిల్మ్‌ సిటీలో ఈ ఆడియో వేడుక జరగదు. రామోజీ ఫిల్మ్‌ సిటీలోకి భారీ సంఖ్యలో జనాలు వెళ్లడం సాధ్యం అయ్యే పని కాదు. పైగా ఎన్నో సినిమాల షూటింగ్‌లు అక్కడ జరుగుతాయి కనుక ఫిల్మ్‌ సిటీ నిర్వాహకులు ఆడియో వేడుకకు అనుమతి ఇవ్వక పోవచ్చు అని సినీ వర్గాల వారు అంటున్నారు. అయితే రామోజీ ఫిల్మ్‌ సిటీ ఎంట్రెన్స్‌లో చేసే అవకాశం ఉంది. మహిష్మతి సామ్రాజ్యం సెట్టింగ్స్‌లలో మాత్రం ఆడియో వేడుక సాధ్యం కాదని తేల్చి చెబుతున్నారు. అయితే ఆ సెట్టింగ్స్‌ను ప్రమోషన్స్‌ కోసం వాడాలని మాత్రం జక్కన్న ప్లాన్‌ చేస్తున్నట్లుగా తెలుస్తోంది.