‘బాహుబలి’ చిత్రంలో దేవసేనగా నటిస్తూనే పలు చిత్రాలను లైన్‌లో పెట్టిన అనుష్కకు ‘బాహుబలి 2’ మినహా వేరే చిత్రాలు పెద్దగా ఫలితాన్ని ఇవ్వలేదు. కానీ దేవసేనగా మాత్రం ఈ అమ్మడికి రావాల్సిన గుర్తింపు వచ్చేసింది. ‘బాహుబలి 2’కోసం జోరుగా ప్రచారం చేసిన ఈ అమ్మడు సైలెంట్‌గా ‘భాగమతి’ చిత్రాన్ని కానిచ్చేసింది. దర్శకుడు అశోక్‌ ఈ చిత్రాన్ని అనుష్క ప్రధాన పాత్రలో నటించగా తెరకెక్కించాడు. అసలు షూటింగ్‌ జరుగుతుందా లేదా అనేది ఏ విధమైన సమాచారం లేకుండానే ‘భాగమతి’ గప్‌చుప్‌గా తెరకెక్కింది.
‘భాగమతి’ షూటింగ్‌ పూర్తి అయ్యిందని చిత్ర యూనిట్‌ వారు తాజాగా ప్రకటించేశారు. ఇక ఈ చిత్రంలో అనుష్క ఎలా ఉంటుంది అనేది ఆసక్తికర విషయం. జూన్‌ మొదటి వారంలో ఈ చిత్ర ఫస్ట్‌లుక్‌ను విడుదల చేయనున్నట్టు ప్రకటించారు. ఈ ఫస్ట్‌లుక్‌ను బాహుబలుడు ప్రభాస్‌ చేతుల మీదుగా విడుదల చేయాలని ప్లాన్‌ చేస్తున్నారు. అందుకు ప్రభాస్‌ను సంప్రదించగా అందుకు ఒకే చెప్పేశాడు. అనుష్క కోసమే ప్రభాస్‌ ఫస్ట్‌లుక్‌ విడుదలకు సిద్దం అయ్యాడు. అయిదు చిత్రాల్లో నటించిన అనుష్క, ప్రభాస్‌ల మధ్య ఆ మాత్రం స్నేహం లేకపోతే ఎలా మరి.
