వివాదాల దర్శకుడు రామ్‌గోపాల్‌ టాలీవుడ్‌లో ఎన్ని విమర్శలు ఎదుర్కొన్న కూడా బాలీవుడ్‌లో మాత్రం స్టార్‌ హీరోలతో సైతం ప్రశంసలు అందుకున్నాడు. వర్మ చేసిన సినిమాలు తెలుగులో పెద్దగా ప్రభావం చూపలేకపోయాయి కానీ హిందీలో మాత్రం సూపర్‌ హిట్‌ అయ్యి వర్మకు మంచి గుర్తింపు తీసుకు వచ్చాయి. తెలుగులో కూడా కొన్ని చిత్రాలు మంచి విజయాన్నే మూటగట్టుకున్నాయి. తాజాగా వర్మ హిందీలో ‘సర్కార్‌ 3’ చిత్ర పనుల్లో బిజీగా ఉన్నాడు. బాలీవుడ్‌ మెగాస్టార్‌ అమితాబ్‌తో వర్మ ఈ చిత్రాన్ని తెరకెక్కిస్తున్నాడు. వర్మ, మెగాస్టార్‌ అమితాబ్‌ల కాంభోలో ఘన విజయం సాధించిన చిత్రాలే వచ్చాయి. దాంతో ‘సర్కార్‌ 3’ చిత్రంపై హిందీలో అంచనాలు తారా స్థాయిలో ఉన్నాయి.
తాజాగా వర్మ గురించి బిగ్‌బి మీడియాతో చెప్పుకొచ్చాడు. వర్మ చాలా క్రియేటివ్‌ దర్శకుడు అని, ఎప్పుడు కొత్తగా చేయాలనే తపన ఉంటుందని, అలాంటప్పుడు కొన్నిసార్లు ఎదురుదెబ్బలు కూడా తగులుతాయి, అంత మాత్రానా వారిలోని టాలెంట్‌ ఎక్కడకు పోదు, వర్మతో కలిసి పనిచేయడం నాకు చాలా ఇష్టం అంటూ వర్మ గురించి తెగ పొగిడేస్తున్నాడు. మొత్తానికి చాలామందికి వర్మ సినిమాలపై నమ్మకం పోయినా కూడా మెగాస్టార్‌ అమితాబ్‌కు మాత్రం గట్టి నమ్మకమే ఉంది.
